"கைதான 8 பேரும் பகடைக்காய்கள்" - ராமர் கோயில் முறைகேட்டில் பிரதமர் விளக்கமளிக்க கெஜ்ரிவால் வலியுறுத்தல்!

அயோத்தி ராமர் கோயில் நன்கொடை முறைகேடு வழக்கில் உ.பி. சிறப்புப் புலனாய்வுக் குழுவின் பரிந்துரையின் பேரில் 8 பேர் கைது செய்யப்பட்டுள்ள நிலையில், இந்த நடவடிக்கை ஒரு ‘வெறும் கண்துடைப்பு’ என்று ஆம் ஆத்மி கட்சியின் தேசிய ஒருங்கிணைப்பாளர் அரவிந்த் கெஜ்ரிவால் மிகக் கடுமையாகச் சாடியுள்ளார்.

"டெல்லியில் இன்று செய்தியாளர்களைச் சந்தித்த அரவிந்த் கெஜ்ரிவால், இந்த ஊழல் விவகாரத்தில் நேரிடையாகப் பிரதமர் நரேந்திர மோடியை நோக்கிப் பல அடுக்கடுக்கான கேள்விகளை எழுப்பினார்.  "அயோத்தி ராமர் கோயிலுக்காக நிலம் வாங்கியது, கோயில் கட்டுமானம் மற்றும் உலகம் முழுவதும் உள்ள கோடிக்கணக்கான பக்தர்கள் வழங்கிய காணிக்கை, தங்க, வெள்ளி நகைகள் ஆகியவற்றில் பல நூறு கோடி ரூபாய் அளவிற்குப் பெரும் ஊழல் நடைபெற்றுள்ளது."

"ஸ்ரீராம ஜென்மபூமி தீர்த்த க்ஷேத்ரா அறக்கட்டளையின் நிர்வாகிகள் அனைவரும் பிரதமராலேயே நேரடியாகத் தேர்ந்தெடுக்கப்பட்டவர்கள். மேலும், மத்திய உள்துறை அமைச்சகத்தின் உயர்மட்ட அதிகாரி ஒருவரும் இந்த அறக்கட்டளையில் இடம்பெற்றுள்ளார். இத்தகைய சூழலில், இந்தத் திருட்டுகளும் முறைகேடுகளும் பிரதமருக்குத் தெரியாமல் நடந்திருக்க வாய்ப்பே இல்லை."

"உண்மைகளை மூடி மறைக்காமல், இந்த மெகா ஊழல் குறித்துப் பிரதமர் மோடி நாட்டு மக்களுக்கு நேரிடையாக விளக்கமளிக்க வேண்டும். இதில் தொடர்புடைய உண்மையான பெரிய புள்ளிகளைக் காப்பாற்ற பிரதமர் ஏன் துடிக்கிறார்?" என்று கேள்வி எழுப்பினார்.

உத்தரப் பிரதேசத்தில் குற்றவாளிகளின் வீடுகளை இடிப்பதற்கு அம்மாநில அரசு பயன்படுத்தும் வழக்கமான உத்தியைச் சுட்டிக்காட்டி உ.பி. முதல்வர் யோகி ஆதித்யநாத்தையும் அவர் விமர்சித்தார். "இந்த வழக்கில் தற்போது கைது செய்யப்பட்டுள்ள 6 வங்கி ஊழியர்கள் உட்பட 8 பேரும் வெறும் கீழ்மட்டப் பகடைக்காய்கள் மட்டுமே. உண்மையான குற்றவாளிகள் இன்னும் வெளியில் சொகுசாக உலா வருகிறார்கள். கோடிக்கணக்கான சனாதனப் பக்தர்களின் ஆன்மிக உணர்வுகளோடு விளையாடி, கடவுளின் காணிக்கைப் பணத்தைத் திருடிய இந்தக் குற்றவாளிகளின் வீடுகளை இடிப்பதற்கு, உ.பி. முதல்வர் யோகி ஆதித்யநாத் தனது புகழ்பெற்ற புல்டோசர்களை ஏன் இன்னும் பயன்படுத்தவில்லை?"

கெஜ்ரிவாலின் இந்த விமர்சனங்களுக்குப் பதிலளித்துப் பேசியுள்ள உ.பி. முதல்வர் யோகி ஆதித்யநாத், "அயோத்தி என்பது சனாதன தர்மத்தின் புனித அடையாளம். அதன் மீது தீய கண் வைக்க யாருக்கும் அனுமதியில்லை. சிறப்புப் புலனாய்வுக் குழுவின் விரிவான விசாரணை அறிக்கை மற்றும் தடயங்களின் அடிப்படையிலேயே இந்த முதல் கட்டக் கைதுகள்  அரங்கேறியுள்ளன. தவறு செய்தவர்கள் யாராக இருந்தாலும், அவர்களுக்கு எவ்வித விலக்கும் அளிக்கப்படாமல் சட்டம் தன் கடமையை மிகக் கடுமையாகச் செய்யும்" என்று உறுதிபடத் தெரிவித்துள்ளார்.