அன்புமணியைச் சந்தித்தார் முதல்வர் விஜய்... தலைவர்களைத் தேடிச் சென்று ஆசி!

தமிழக முதலமைச்சர் ஜோசப் விஜய், இன்று (மே 11) அரசியல் கட்சித் தலைவர்களைத் தொடர்ச்சியாகச் சந்தித்து வாழ்த்துப் பெற்று வருகிறார். காலையில் திமுக தலைவர் மு.க.ஸ்டாலின் மற்றும் மதிமுக பொதுச்செயலாளர் வைகோ ஆகியோரைச் சந்தித்ததைத் தொடர்ந்து, தற்போது பாமக தலைவர் அன்புமணி ராமதாஸை விஜய் நேரில் சந்தித்துள்ளார். சென்னை தியாகராய நகரில் உள்ள அன்புமணியின் இல்லத்திற்கு நேரில் சென்ற முதலமைச்சர், அங்கு அவருக்குப் பொன்னாடை போர்த்தித் தனது மரியாதையைச் செலுத்தினார்.

இந்தச் சந்திப்பின் போது, தமிழகத்தின் தற்போதைய கல்விச் சூழல், நீட் தேர்வு விவகாரம் மற்றும் சமூக நீதி சார்ந்த திட்டங்கள் குறித்து இருவரும் விரிவாக ஆலோசித்ததாகக் கூறப்படுகிறது. குறிப்பாக, பாமக முன்வைக்கும் பல்வேறு மக்கள் நலக் கோரிக்கைகள் குறித்தும் அன்புமணி முதலமைச்சரின் கவனத்திற்குக் கொண்டு சென்றார். புதிய முதலமைச்சராகப் பொறுப்பேற்றுள்ள விஜய்க்கு, அன்புமணி ராமதாஸ் தனது மனமார்ந்த வாழ்த்துகளைத் தெரிவித்ததுடன், நல்லாட்சி அமைய ஆலோசனைகளையும் வழங்கினார்.

பதவியேற்ற முதல் நாளிலேயே கூட்டணிக் கட்சிகள் மற்றும் எதிர்க்கட்சிகளைச் சேர்ந்த மூத்த தலைவர்களைத் தேடிச் சென்று விஜய் சந்திப்பது தமிழக அரசியலில் ஒரு ஆரோக்கியமான முன்னுதாரணமாகப் பார்க்கப்படுகிறது. இந்தத் தொடர் சந்திப்புகள் அரசியல் மாண்பைக் காக்கும் வகையில் அமைந்துள்ளதாகப் பல்வேறு தரப்பினரும் பாராட்டு தெரிவித்து வருகின்றனர். அன்புமணியுடனான சந்திப்பைத் தொடர்ந்து, இன்று மாலை நாம் தமிழர் கட்சி ஒருங்கிணைப்பாளர் சீமானையும் விஜய் சந்திக்க உள்ளதாகத் தகவல்கள் தெரிவிக்கின்றன.