இலங்கைத் தமிழர் அனோஜனுக்கு நிம்மதி! மரண தண்டனையை ரத்து செய்த சவூதி உச்ச நீதிமன்றம்
சமூக வலைதளத்தில் நபிகள் நாயகம் குறித்து அவதூறான கருத்தைப் பதிவிட்டதாகக் குற்றம் சாட்டப்பட்ட இலங்கைத் தமிழர் அனோஜன் சிவராசாவுக்கு விதிக்கப்பட்ட மரண தண்டனையை சவூதி அரேபிய உச்ச நீதிமன்றம் ரத்து செய்துள்ளது. அக்டோபர் 13-ம் தேதி இந்தத் தீர்ப்பு வழங்கப்பட்டதாக இலங்கை வெளியுறவுத்துறை துணை அமைச்சர் அருண் ஹேமச்சந்திரா தெரிவித்துள்ளார். இதனால் அனோஜன் மற்றும் அவரது குடும்பத்தினருக்கு நிம்மதி ஏற்பட்டுள்ளது.
தூதரகம், சட்டக் குழுவின் முயற்சி
சமூக வலைதளப் பதிவு தொடர்பான வழக்கில் அனோஜனுக்கு முதலில் 5 ஆண்டுகள் சிறைத் தண்டனையும், 30 லட்சம் சவூதி ரியால் அபராதமும் விதிக்கப்பட்டது. பின்னர் மேல்முறையீட்டில் அவருக்கு மரண தண்டனை விதிக்கப்பட்டது. இதை எதிர்த்து, இலங்கை அரசின் முயற்சியுடன் சவூதி அரேபிய உச்ச நீதிமன்றத்தில் அக்டோபர் 11-ம் தேதி மேல்முறையீடு செய்யப்பட்டது.
தொழில்நுட்பக் கோளாறு வாதம்
சமூக வலைதளப் பதிவு தொடர்பாக தொழில்நுட்பத் தவறு அல்லது கணக்கு ஊடுருவல் ஏற்பட்டிருக்கலாம் என அனோஜன் தரப்பில் வாதிடப்பட்டதாகத் தகவல்கள் தெரிவிக்கின்றன. இலங்கைத் தூதரகம், வெளியுறவுத்துறை அதிகாரிகள் மற்றும் இரு நாடுகளின் சட்டக் குழுவினர் மேற்கொண்ட முயற்சிகளைத் தொடர்ந்து மரண தண்டனை ரத்து செய்யப்பட்டுள்ளது. எனினும், தண்டனை ரத்து செய்யப்பட்டிருப்பது வழக்கின் பிற சட்ட நடவடிக்கைகள் முடிவடைந்துவிட்டன என்பதைக் குறிக்கிறதா என்பது குறித்து கூடுதல் அதிகாரப்பூர்வ விளக்கம் வெளியாக வேண்டியுள்ளது.