கள்ளக்குறிச்சியில் அடுத்த அதிர்ச்சி... விஷப்பாம்பு கடித்து 2 பெண் குழந்தைகள் உயிரிழப்பு - தாய்க்கு தீவிர சிகிச்சை!

 
பாம்பு

கள்ளக்குறிச்சி மாவட்டம் மூக்கனூர் பகுதியில் நள்ளிரவில் வீட்டின் தரைப்பகுதியில் தூங்கிக்கொண்டிருந்தபோது விஷப்பாம்பு கடித்ததில் இரண்டு பச்சைக் குழந்தைகள் பரிதாபமாக உயிரிழந்தனர். இச்சம்பவத்தில் குழந்தைகளைக் காப்பாற்ற முயன்ற தாயும் பாம்பு கடித்துக் படுகாயமடைந்த நிலையில் மருத்துவமனையில் தீவிர சிகிச்சை பெற்று வருகிறார்.

கள்ளக்குறிச்சி மாவட்டம் மூக்கனூர் பகுதியைச் சேர்ந்த குடும்பம் ஒன்று வழக்கம் போல் இரவு தங்களது வீட்டில் உறங்கிக் கொண்டிருந்தது. நள்ளிரவு நேரத்தில் வீட்டின் குளிர்ந்த சூழலைப் பயன்படுத்தியோ அல்லது உணவுத் தேடியோ எதிர்பாராதவிதமாக விஷப்பாம்பு ஒன்று வீட்டிற்குள் நுழைந்துள்ளது.

பாம்பு

வீட்டின் தரையில் தூங்கிக் கொண்டிருந்த 3 வயது சிறுமி தர்ஷினி மற்றும் ஒன்றரை வயது பச்சைக் குழந்தை ஜனனி ஆகியோரின் மீது ஊர்ந்து சென்ற அந்த விஷப்பாம்பு திடீரெனக் கடித்துள்ளது. கடிபட்ட வலியால் குழந்தைகள் அலறித் துடித்து அழத் தொடங்கினர். குழந்தைகளின் அலறல் சத்தம் கேட்டு திடுக்கிட்டு விழித்தெழுந்த தாய், அருகில் என்ன நடக்கிறது என்பதை உணர்வதற்குள் அந்த விஷப்பாம்பு அவரையும் கடித்துள்ளது.

உடனடியாகக் குடும்பத்தினரும் அக்கம் பக்கத்தினரும் இணைந்து விஷக்கடியால் பாதிக்கப்பட்டு உயிருக்குப் போராடிய தாய் மற்றும் இரு குழந்தைகளையும் மீட்டுத் துரிதமாக அருகிலுள்ள அரசு மருத்துவமனைக்கு அழைத்துச் சென்றனர். மருத்துவமனைக்குக் கொண்டு செல்லும் வழியிலேயே சிறுமி தர்ஷினி மற்றும் குழந்தை ஜனனி ஆகியோரின் உடலில் விஷம் வேகமாகப் பரவி பரிதாபமாக உயிரிழந்தனர். மருத்துவர்கள் பரிசோதித்தபோது குழந்தைகள் இருவரும் ஏற்கனவே இறந்துவிட்டதாகத் தெரிவித்தனர்.

பாம்பு

இதனிடையே, உயிருக்கு ஆபத்தான நிலையில் தீவிர சிகிச்சை பிரிவில் அனுமதிக்கப்பட்டுள்ள குழந்தைகளின் தாய்க்கு மருத்துவர்கள் தொடர் சிகிச்சைகளை வழங்கி வருகின்றனர். ஒரே குடும்பத்தைச் சேர்ந்த இரண்டு பச்சைக் குழந்தைகள் விஷப்பாம்பு கடித்து உயிரிழந்த இந்தச் செய்தி அப்பகுதி மக்களைப் பெரும் சோகத்திலும் கண்ணீரிலும் ஆழ்த்தியுள்ளது.