கத்தார், குவைத், UAE, ஜோர்டான், பஹ்ரைனில் தாக்குதல் - மத்திய கிழக்கு முழுவதும் பரவிய போர்!

2026-ஆம் ஆண்டின் தொடக்கத்தில் மத்திய கிழக்கு ஆசியாவில் மிக மோசமான போர்ச் சூழல் உருவாகியுள்ளது. அமெரிக்கா மற்றும் இஸ்ரேல் நாடுகள் இணைந்து ஈரான் மீது நடத்திய 'ஆபரேஷன் எபிக் பியூரி' தாக்குதலுக்குப் பதிலடியாக, ஈரான் தனது அண்டை நாடுகளிலுள்ள அமெரிக்க ராணுவத் தளங்களைக் குறிவைத்துத் தாக்குதலைத் தீவிரப்படுத்தியுள்ளது.

ஈரான் தனது 'புரட்சிகர காவல் படை' மூலம் இஸ்ரேல் மட்டுமல்லாது, அமெரிக்காவிற்கு ஆதரவாகச் செயல்படும் வளைகுடா நாடுகள் மீதும் ஏவுகணை மற்றும் ட்ரோன் தாக்குதல்களை நடத்தியுள்ளது. ஐக்கிய அரபு அமீரகம் அபுதாபிக்கு அருகே உள்ள அல்-தாஃப்ரா அமெரிக்க விமானப்படைத் தளம் குறிவைக்கப்பட்டது. ஏவுகணைச் சிதறல்கள் குடியிருப்புப் பகுதியில் விழுந்ததில் ஆசிய வம்சாவளியைச் சேர்ந்த ஒருவர் உயிரிழந்துள்ளார். கத்தாரில் உள்ள அல்-உடைத் என்ற மிகப்பெரிய அமெரிக்க ராணுவத் தளம் மீது ஈரான் ஏவுகணைகளை வீசியுள்ளது. இதில் சில ஏவுகணைகளைத் தற்காப்பு அமைப்புகள் முறியடித்தாலும், தளம் அமைந்துள்ள பகுதியில் பலத்த வெடிச் சத்தங்கள் கேட்டதாகக் கூறப்படுகிறது.

பஹ்ரைனில் உள்ள அமெரிக்காவின் 5வது கடற்படைத் தளம் மீது தாக்குதல் நடத்தப்பட்டதை அடுத்து, பஹ்ரைன் அரசு தனது வான்வெளியை முழுமையாக மூடியுள்ளது. குவைத் அலி அல்-சலேம் விமானப்படைத் தளம் மீது ட்ரோன் தாக்குதல்கள் நடத்தப்பட்டுள்ளன. ஜோர்டான் இஸ்ரேலுக்குச் செல்லும் ஈரானிய ஏவுகணைகளை ஜோர்டான் இடைமறித்ததால், கோபமடைந்த ஈரான் அந்த நாட்டின் எல்லைப் பகுதிகளிலும் தாக்குதல் நடத்தியதாகத் தகவல்கள் தெரிவிக்கின்றன.

அமெரிக்க அதிபர் டொனால்ட் டிரம்ப் மற்றும் இஸ்ரேல் பிரதமர் நெதன்யாகு ஆகியோர் இணைந்து, ஈரானின் அணுசக்தி மையங்களை அழிப்பதே இந்தத் தாக்குதலின் நோக்கம் என அறிவித்துள்ளனர். இதற்குப் பதிலடியாக, "எங்கள் நிலப்பரப்பில் ஒரு குண்டு விழுந்தால், வளைகுடா நாடுகள் எதிலும் அமெரிக்கத் தளங்கள் இருக்காது" என ஈரான் ஏற்கனவே எச்சரித்திருந்தது. அந்த எச்சரிக்கையின் படியே தற்போது தாக்குதல்கள் அரங்கேறி வருகின்றன.

சவுதி அரேபியா, அமீரகம், கத்தார் உள்ளிட்ட நாடுகள் வான்வெளியை மூடியுள்ளதால், இந்தியாவிலிருந்து துபாய், லண்டன், அமெரிக்கா செல்லும் நூற்றுக்கணக்கான விமானங்கள் ரத்து செய்யப்பட்டுள்ளன அல்லது மாற்றுப் பாதையில் இயக்கப்படுகின்றன. போர் காரணமாகக் கச்சா எண்ணெய் விலை ஒரே நாளில் 15% வரை உயர்ந்துள்ளது. இது இந்தியாவில் பெட்ரோல், டீசல் விலையில் மிகப்பெரிய தாக்கத்தை ஏற்படுத்தும் என அஞ்சப்படுகிறது.

வளைகுடா நாடுகளில் சுமார் 90 லட்சம் இந்தியர்கள் வசித்து வருகின்றனர். அவர்களின் பாதுகாப்பைக் கருத்தில் கொண்டு, இந்திய வெளியுறவுத் துறை அமைச்சகம் 24 மணி நேரக் கட்டுப்பாட்டு அறையைத் திறந்து கண்காணித்து வருகிறது. மத்திய கிழக்கில் போர் மேகங்கள் சூழ்ந்துள்ள நிலையில், ஐக்கிய நாடுகள் சபை அவசரக் கூட்டத்தைக் கூட்டியுள்ளது.