ஆஸ்திரேலியக் கடற்கரையில் கரை ஒதுங்கிய மர்மமான உலோகப் பந்துகள்... பரபரப்பு வீடியோ!
ஆஸ்திரேலிய நாட்டின் வடக்கு குயின்ஸ்லாந்து மாகாணத்தில் உள்ள புகழ்பெற்ற பாரஸ்ட் கடற்கரையில், கடந்த சில தினங்களாக மர்மமான வெள்ளி நிற உலோகப் பந்துகள் அடுத்தடுத்து கரை ஒதுங்கி வருகின்றன. இந்த விசித்திரப் பொருட்கள் திடீரெனக் கரை ஒதுங்கியதால் அந்தப் பகுதி மக்களிடையே பெரும் பயமும் பரபரப்பும் ஏற்பட்டது. இதுகுறித்துத் தகவல் அறிந்து சம்பவ இடத்திற்கு விரைந்து வந்த தீயணைப்புத் துறையினர், அந்தப் பொருட்களைக் கைப்பற்றி ஆய்வுக்கு அனுப்பியதுடன், கடற்கரையின் 50 மீட்டர் சுற்றளவைத் தடை செய்யப்பட்ட பகுதியாக மாற்றி அதிரடி நடவடிக்கை எடுத்துள்ளனர்.
கரை ஒதுங்கிய இந்த மர்மமான பந்துகள் குறித்து ஆஸ்திரேலிய விண்வெளி முகமை நடத்திய தீவிர அறிவியல் ஆய்வில், இவை அனைத்தும் விண்வெளிச் சிதைவுகள் என்பது தற்போது அதிகாரப்பூர்வமாக உறுதி செய்யப்பட்டுள்ளது. விண்ணில் செலுத்தப்படும் ராக்கெட்டுகளில் பயன்படுத்தப்படும் அழுத்தக் கலன்கள் எனப்படும் முக்கியப் பாகங்களே இவை என்று ஆய்வாளர்கள் தெரிவித்துள்ளனர். பூமியின் சுற்றுப்பாதையில் இருந்து சமீபத்தில் வளிமண்டலத்திற்குள் நுழைந்த ஏதோ ஒரு வெளிநாட்டு ராக்கெட்டின் பாகங்களோடு இந்த உலோகப் பந்துகள் கச்சிதமாக ஒத்துப்போவதாக அதிகாரிகள் விளக்கியுள்ளனர்.
இவை தற்போதைக்கு ஆபத்தில்லாத பொருட்களாகக் கருதப்பட்டாலும், இது எந்த நாட்டின் ராக்கெட்டில் இருந்து பிரிந்து விழுந்தது என்பதைக் கண்டறிய சர்வதேச விண்வெளி ஆய்வு நிறுவனங்களைத் தொடர்பு கொண்டு கேட்டு வருவதாக அதிகாரிகள் கூறியுள்ளனர். மேலும் இது போன்ற விண்வெளிச் சிதைவுகள் இன்னும் பல கடற்கரையில் கரை ஒதுங்கக்கூடும் என்பதால், பொதுமக்கள் யாரும் அவற்றைச் சுய விருப்பத்தின் பேரில் தொடவோ, நகர்த்தவோ அல்லது வீட்டிற்கு எடுத்துச் செல்லவோ கூடாது என விண்வெளி முகமை கடுமையான எச்சரிக்கை விடுத்துள்ளது. ஆபத்து இல்லை என்று முழுமையாக நிரூபிக்கப்படும் வரை கடற்கரையில் கிடக்கும் மர்மப் பொருட்களை ஆபத்தானது என்றே மக்கள் தார்மீகமாகக் கருத வேண்டும் என அறிவுறுத்தப்பட்டுள்ளது.