உளவுத்துறை ஐ.ஜி-யாக அஸ்ரா கார்க் நியமனம்.. .கரூர் வழக்கை விசாரித்த ஐபிஎஸ் அதிகாரிக்கு பதவி உயர்வு!

தமிழகத்தில் ஆட்சி மாற்றம் ஏற்பட்டு, முதலமைச்சர் சி. ஜோசப் விஜய் தலைமையிலான தமிழக வெற்றி கழக அரசு பொறுப்பேற்றது முதல், அரசு இயந்திரத்தில் பல்வேறு அதிரடி மாற்றங்கள் செய்யப்பட்டு வருகின்றன. குறிப்பாக, காவல்துறை மற்றும் நிர்வாகத் துறையில் முக்கியப் பொறுப்புகளுக்குத் திறமையான அதிகாரிகளை நியமிப்பதில் அரசு வேகம் காட்டி வருகிறது. அந்த வகையில், தமிழக காவல்துறையின் மிக முக்கியமான பிரிவான உளவுத்துறையின் புதிய ஐ.ஜி-யாக அஸ்ரா கார்க் ஐபிஎஸ் நியமிக்கப்பட்டுள்ளார்.

தமிழக சட்டமன்றத் தேர்தலின் போது இந்தியத் தேர்தல் ஆணையத்தால் உளவுத்துறை ஐ.ஜி-யாக நியமிக்கப்பட்டிருந்த அவினாஷ் குமார், தற்போது அந்தப் பொறுப்பிலிருந்து விடுவிக்கப்பட்டுள்ளார். அவருக்குப் பதிலாக, வடக்கு மண்டல ஐ.ஜி-யாகப் பணியாற்றி வந்த அஸ்ரா கார்க்கை உளவுத்துறை ஐ.ஜி-யாக நியமித்து, தமிழக அரசின் கூடுதல் தலைமைச் செயலாளர் மணிவாசன் அதிகாரப்பூர்வ உத்தரவைப் பிறப்பித்துள்ளார்.

தமிழக காவல்துறையில் 'நேர்மையான மற்றும் கண்டிப்பான அதிகாரி' என்று பெயரெடுத்தவர் அஸ்ரா கார்க். சமூகக் குற்றங்களுக்கு எதிரான போர்: கந்துவட்டி கொடுமை, சாதிய மோதல்கள், கட்டப்பஞ்சாயத்து மற்றும் போதைப்பொருள் கடத்தல் போன்ற சமூகத் தீமைகளுக்கு எதிராக இவர் எடுத்த நடவடிக்கைகள் மக்களிடையே இவருக்கு மிகப்பெரிய நன்மதிப்பைத் தேடித்தந்தது.

தென்மண்டல ஐ.ஜி-யாக இவர் பணியாற்றிய போது, போதைப்பொருள் கடத்தல்காரர்களின் சொத்துக்களை முடக்கிய இவரது அதிரடி நடவடிக்கையை நீதிமன்றமே பாராட்டியது குறிப்பிடத்தக்கது. அஸ்ரா கார்க்கின் நியமனம் அரசியல் வட்டாரத்திலும், காவல்துறை வட்டாரத்திலும் பேசுபொருளாக மாறியுள்ளது. இதற்கு ஒரு முக்கியப் பின்னணி உண்டு. கடந்த சட்டமன்றத் தேர்தல் பிரச்சாரத்தின் போது, கரூரில் தற்போதைய முதலமைச்சர் விஜய் பங்கேற்ற பொதுக்கூட்டத்தில் ஏற்பட்ட கூட்ட நெரிசலில் சிக்கி 41 பேர் உயிரிழந்தனர்.

இந்தத் துயரமான சம்பவம் குறித்து விசாரிக்க, அப்போதைய திமுக அரசு அஸ்ரா கார்க் தலைமையில் தான் சிறப்புப் புலனாய்வுக் குழுவை அமைத்தது. பின்னர் இந்த வழக்கு சிபிஐ-க்கு மாற்றப்பட்டாலும், இந்த வழக்கை ஆரம்பக் கட்டத்தில் கையாண்ட இவரது அனுபவம் இப்போது முக்கியமாகக் கருதப்படுகிறது.

தமிழக முதலமைச்சர் விஜயின் நேரடிப் பார்வையில் இயங்கும் உளவுத்துறைக்கு அஸ்ரா கார்க் போன்ற ஒரு 'ஆக்சன்' அதிகாரி நியமிக்கப்பட்டிருப்பது, மாநிலத்தில் நிலவும் சட்டம்-ஒழுங்கு மற்றும் போதைப்பொருள் ஒழிப்பு நடவடிக்கைகளில் அரசு தீவிரமாக இருப்பதை உறுதிப்படுத்துகிறது.