பகீர்... ‘திமுக ஆட்சியில் 61% குழந்தைகளுக்கு எதிரான குற்றங்கள் அதிகரிப்பு - அதிரவைக்கும் NCRB புள்ளிவிவரங்கள்!

தமிழகத்தில் சட்டம், ஒழுங்கு சீராக இருப்பதாக ஆளும் அரசு கூறிவரும் வேளையில், தேசிய குற்றப் பதிவுப் பணியகத்தின் (NCRB) சமீபத்திய புள்ளிவிவரங்கள் ஒரு கசப்பான உண்மையை வெளிச்சம் போட்டுக் காட்டியுள்ளன. திமுக அரசு பொறுப்பேற்ற 2021ம் ஆண்டு முதல், குழந்தைகளுக்கு எதிரான குற்றங்கள் முன்னெப்போதும் இல்லாத வகையில் 61% அதிகரித்துள்ளது. இது வெறும் அரசியல் விமர்சனம் மட்டுமல்ல, அதிகாரப்பூர்வத் தரவுகள் முன்வைக்கும் மிகப்பெரிய அபாய எச்சரிக்கை.

கடந்த அதிமுக ஆட்சியின் இறுதி ஆண்டான 2020-ல் தமிழகத்தில் குழந்தைகளுக்கு எதிரான குற்றச் சம்பவங்கள் 4,338-ஆகப் பதிவாகியிருந்தது. ஆனால், திமுக ஆட்சிக்கு வந்த பிறகு இந்த எண்ணிக்கை சீராக உயரத் தொடங்கியது. 2021ம் ஆண்டில் 6,064 வழக்குகள் பதிவாகியுள்ளன. 2022-ஆம் ஆண்டில் 6,580 வழக்குகள், 2023-ஆம் ஆண்டில் 6,968 வழக்குகள் என மூன்றே ஆண்டுகளில் இந்த எண்ணிக்கை 6,968-ஆக (61% உயர்வு) அதிகரித்திருப்பது, மாநிலத்தின் பாதுகாப்பு அமைப்பில் உள்ள ஓட்டையை அப்பட்டமாகத் தோலுரித்துக் காட்டுகிறது.

கிருஷ்ணகிரி கொடூரமும் திமுக நிர்வாகியின் கைதும்

இந்தக் காலக்கட்டத்தில் நடந்த பல சம்பவங்கள் தமிழகத்தையே உலுக்கின. குறிப்பாக, கிருஷ்ணகிரி மாவட்டம் அஞ்செட்டியில் இரண்டரை வயது சிறுமி பாலியல் வன்கொடுமை செய்யப்பட்டு கொல்லப்பட்ட சம்பவம், ஆளும் திமுக அரசுக்கு மிகப்பெரிய தலைவலியை ஏற்படுத்தியது. இந்த வழக்கில் திமுக இளைஞரணியைச் சேர்ந்த உள்ளூர் நிர்வாகி பெரியநாயகம் என்பவர் கைது செய்யப்பட்டார். ஆளும் கட்சியுடன் தொடர்புடைய ஒருவரே இத்தகைய கொடூரச் செயலில் ஈடுபட்டது, "சட்டம் தன் கடமையைச் செய்யும்" என்ற அரசின் கூற்றுக்கு மிகப்பெரிய சவாலாக அமைந்தது.

அதேபோல், பர்கூர் அருகே போலி என்.சி.சி முகாம் நடத்தி பல மாணவிகள் பாலியல் துன்புறுத்தலுக்கு ஆளான சம்பவம், பள்ளிக் கல்வித்துறையின் கண்காணிப்பு எவ்வளவு பலவீனமாக உள்ளது என்பதை உணர்த்தியது. முறையாகப் பின்னணி சரிபார்ப்பு இல்லாமல் பள்ளிக்குள் ஒரு நபர் முகாம் நடத்த அனுமதிக்கப்பட்டது, நிர்வாகத் தோல்வியின் உச்சமாகப் பார்க்கப்படுகிறது.

நீதித்துறை முடக்கம்: 14 நீதிமன்றங்கள் மட்டுமே!

குற்றங்கள் ஒருபுறம் அதிகரித்து வரும் நிலையில், பாதிக்கப்பட்ட குழந்தைகளுக்கு நீதி கிடைப்பதில் மிகப்பெரிய தாமதம் நிலவுகிறது. தமிழகத்தில் நிலுவையில் உள்ள போக்சோ வழக்குகளில் 60%-க்கும் அதிகமானவை பல ஆண்டுகளாகத் தீர்ப்பு வராமல் நிலுவையில் உள்ளன. இதற்குக் காரணம், மாநிலத்தில் உள்ள பிரத்யேக போக்சோ நீதிமன்றங்களின் கடுமையான பற்றாக்குறை. தற்போது தமிழகம் முழுவதும் வெறும் 14 பிரத்யேக போக்சோ நீதிமன்றங்கள் மட்டுமே உள்ளன.

100-க்கும் மேற்பட்ட வழக்குகள் நிலுவையில் உள்ள மாவட்டங்களில் சிறப்பு நீதிமன்றங்கள் அமைக்கப்பட வேண்டும் என்ற உச்ச நீதிமன்றத்தின் 2019-ஆம் ஆண்டு உத்தரவை திமுக அரசு இன்னும் முழுமையாக அமல்படுத்தவில்லை. ஏப்ரல் 2025-க்குள் 14 கூடுதல் நீதிமன்றங்கள் அமைக்கப்படும் எனச் சட்டத்துறை அமைச்சர் எஸ். ரகுபதி உறுதியளித்திருந்தாலும், அதுவரை ஆயிரக்கணக்கான குழந்தைகள் நீதிக்காகக் காத்திருக்க வேண்டிய அவலநிலை உள்ளது.

பெருகும் போதைப்பொருள்: குற்றங்களின் ஊற்றுக்கண்

குழந்தைகளுக்கு எதிரான வன்முறைகள் அதிகரிக்க மது மற்றும் போதைப்பொருள் புழக்கமே முக்கியக் காரணம் எனச் சமூக ஆர்வலர்கள் குற்றம் சாட்டுகின்றனர். தமிழகத்தில் குடியிருப்புப் பகுதிகள் மற்றும் பள்ளிகளுக்கு மிக அருகாமையில் மதுக் கடைகள்செயல்படுவது, சமூகச் சீரழிவிற்கு வித்திடுகிறது. கஞ்சா மற்றும் சிந்தெடிக் போதைப்பொருட்கள் இளைஞர்களிடையே தங்கு தடையின்றி கிடைப்பது, இத்தகைய வக்கிரமான குற்றங்கள் பெருகக் காரணமாகிறது. காவல்துறையின் 'ஆபரேஷன் கஞ்சா' போன்ற நடவடிக்கைகள் வெறும் கண்துடைப்பாகவே முடிவதாக எதிர்க்கட்சிகள் விமர்சிக்கின்றன.

அரசு சொல்லும் வாதமும் - நிதர்சனமும்

"குற்றங்கள் அதிகரிக்கவில்லை, அதிகமான மக்கள் புகார் அளிக்க முன்வருவதால்தான் எண்ணிக்கை அதிகமாகத் தெரிகிறது" என்பது திமுக அரசின் வாதம். ஆனால், சிசுக்கொலைகள் மற்றும் சிறுமிகள் கொல்லப்படும் சம்பவங்கள் அதிகரித்து வருவதை வெறும் 'விழிப்புணர்வு' என்ற ஒற்றைச் சொல்லால் நியாயப்படுத்த முடியாது. 2023-ஆம் ஆண்டில் மட்டும் 67 குழந்தைகள் கொல்லப்பட்டுள்ளனர். இதில் இருவர் கொல்லப்படுவதற்கு முன்பு பாலியல் வன்கொடுமைக்கு ஆளாகியுள்ளனர். திமுகவின் முதல் மூன்று ஆண்டுகளில் மட்டும் மொத்தம் 217 குழந்தைகள் கொல்லப்பட்டிருப்பது அரசுக்கு விடப்பட்டுள்ள மிகப்பெரிய சவால்.

2026 தேர்தலும் பாதுகாப்பும்

தமிழகம் சட்டமன்றத் தேர்தலை எதிர்நோக்கியுள்ள நிலையில், சட்டம் - ஒழுங்கு என்பது மிகமுக்கிய தேர்தல் ஆயுதமாக மாறப்போகிறது. திமுக அரசின் கீழ் குழந்தைகள் மற்றும் பெண்களுக்குப் பாதுகாப்பு இல்லை என்ற பிம்பம் மக்களிடையே வலுப்பெற்று வருகிறது. குறிப்பாக, நாம் தமிழர் கட்சி, தவெக, அதிமுக, பாஜக போன்ற கட்சிகள் இந்த 61% அதிகரிப்பைத் தங்கள் பிரச்சாரங்களில் முதன்மைப்படுத்தி வருகின்றன. அரசு வெறும் எண்ணிக்கையைக் குறைப்பதில் ஆர்வம் காட்டாமல், குற்றவாளிகளுக்கு விரைவான தண்டனை கிடைப்பதை உறுதி செய்ய வேண்டும். போதைப்பொருள் நடமாட்டத்தை இரும்புக்கரம் கொண்டு அடக்குவதும், ஒவ்வொரு மாவட்டத்திலும் போதுமான போக்சோ நீதிமன்றங்களை அமைப்பதும் மட்டுமே தமிழகத்தின் எதிர்காலத் தலைமுறையைக் காப்பாற்றும்.