மெட்ரோ ரெயில் இருக்கையில் படுத்து பயணம் செய்த வாலிபர்!

பெங்களூருவில் மெட்ரோ ரெயிலில் பயணம் செய்த வாலிபர் ஒருவர், இருக்கையில் அமராமல் படுத்தபடி பயணம் செய்த வீடியோ சமூக வலைதளங்களில் வைரலாகி வருகிறது. பொதுப் போக்குவரத்தில் பயணிகள் கடைப்பிடிக்க வேண்டிய ஒழுங்குகள் குறித்து இந்தச் சம்பவம் விவாதத்தை ஏற்படுத்தியுள்ளது.

மெட்ரோ இருக்கையில் படுத்தபடி பயணம்

பெங்களூருவில் ஒயிட்பீல்டு–செல்லக்கட்டா, ஆர்.வி. ரோடு–பொம்மசந்திரா, மாதவரா–சில்க் இன்ஸ்டிடியூட் உள்ளிட்ட வழித்தடங்களில் மெட்ரோ ரெயில்கள் இயக்கப்படுகின்றன. தினமும் ஏராளமானோர் இந்தச் சேவையைப் பயன்படுத்தி வருகின்றனர்.

இந்நிலையில், மெட்ரோ ரெயிலில் பயணம் செய்த வாலிபர் ஒருவர் இருக்கையில் அமராமல் படுத்துக் கிடந்துள்ளார். இதனை மற்றொரு பயணி தனது செல்போனில் வீடியோவாகப் பதிவு செய்து சமூக வலைதளத்தில் வெளியிட்டதாகத் தெரிவிக்கப்பட்டுள்ளது. அந்த வீடியோ தற்போது வைரலாகியுள்ளது.

நடவடிக்கை எடுக்கக் கோரும் இணையவாசிகள்

மெட்ரோ ரெயில்களில் பயணிகள் ஒழுங்காக நடந்துகொள்ள வேண்டும் என்றும், பிற பயணிகளுக்கு இடையூறு ஏற்படுத்தக் கூடாது என்றும் பல்வேறு கட்டுப்பாடுகள் உள்ளன. இந்நிலையில், இருக்கையில் படுத்தபடி பயணம் செய்த வாலிபரின் வீடியோவைப் பார்த்த இணையவாசிகள், அவரைக் கண்டறிந்து உரிய நடவடிக்கை எடுக்க வேண்டும் என மெட்ரோ நிர்வாகத்திடம் வலியுறுத்தி வருகின்றனர்.