வாக்காளர் பட்டியலில் பெயர் சேர்க்க கூடுதல் அவகாசம் - பாஜக துணைத்தலைவர் கரு.நாகராஜன்!

தமிழகத்தில் வரைவு வாக்காளர் பட்டியலில் பெயர் விடுபட்டவர்கள் விண்ணப்பிக்க கூடுதல் கால அவகாசம் வழங்க வேண்டும் என தமிழக பா.ஜ.க. சார்பில் தலைமை தேர்தல் அதிகாரியிடம் மனு அளிக்கப்பட்டுள்ளது.

தமிழக பா.ஜ.க. மாநில துணைத்தலைவர் கரு.நாகராஜன் இன்று சென்னை தலைமைச் செயலகத்தில் தமிழக தலைமை தேர்தல் அதிகாரியை நேரில் சந்தித்தார். அப்போது, வாக்காளர் பட்டியலில் நிலவும் குளறுபடிகள் மற்றும் கால அவகாச நீட்டிப்பு குறித்து கட்சியின் சார்பில் கோரிக்கை மனுவை அளித்தார்.

செய்தியாளர்களிடம் பேசிய கரு.நாகராஜன், "தமிழகத்தில் எஸ்.ஐ.ஆர் (SIR) நடவடிக்கைக்குப் பிறகு வெளியிடப்பட்ட வரைவு வாக்காளர் பட்டியலில் இருந்து சுமார் 97 லட்சம் வாக்காளர்கள் நீக்கப்பட்டுள்ளதாக தேர்தல் ஆணையம் தெரிவித்துள்ளது. இதில் இறந்தவர்கள்: 26 லட்சம் பேர், இரட்டைப் பதிவு: 4 லட்சம் பேர், நிரந்தரமாக இடம் மாறியவர்கள்: 65 லட்சம் பேர், இருப்பினும், நீக்கப்பட்டவர்களில் இதுவரை 12 லட்சம் பேர் மட்டுமே மீண்டும் விண்ணப்பித்துள்ளனர். மீதமுள்ள பல லட்சம் வாக்காளர்களின் நிலை கேள்விக்குறியாக உள்ளது," எனத் தெரிவித்தார்.

பா.ஜ.க. அளித்துள்ள மனுவில் குறிப்பிட்டுள்ள முக்கிய காரணங்கள் வருமாறு: வரைவுப் பட்டியலில் விடுபட்டவர்கள் 'படிவம்-6' (Form-6) மூலம் புதிதாக விண்ணப்பிக்க வேண்டும். இதற்குத் தேவையான அரசு ஆவணங்களைப் பெறுவதற்குத் தற்போது வழங்கப்பட்டுள்ள கால அவகாசம் போதுமானதாக இல்லை.

களப்பணியின் போது வாக்காளர்களின் அறியாமை அல்லது வீட்டில் இல்லாத சூழல் காரணமாகச் சில படிவங்கள் பெறப்படாமல் விடுபட்டிருக்க வாய்ப்புள்ளது. 80 வயதிற்கு மேற்பட்ட மூத்த குடிமக்கள் மற்றும் நோயாளிகளால் தேர்தல் பதிவு அலுவலர் (ERO) முன் நேரில் ஆஜராக முடிவதில்லை. அவர்களுக்கு ஏ.எஸ்.டி (ASD) தொடர்பான நோட்டீஸ்களுக்குப் பதிலளிக்கச் சிறப்பு கவனிப்பும், கூடுதல் நேரமும் தேவைப்படுகிறது.

ஜனநாயகக் கடமையான வாக்களிப்பதை உறுதி செய்ய, தகுதியுள்ள ஒரு வாக்காளர் கூட விடுபடக்கூடாது என்பதே பா.ஜ.க-வின் நோக்கம். எனவே, பொதுமக்கள் தகுந்த ஆதாரங்களுடன் விண்ணப்பிக்க ஏதுவாக, கோரிக்கை மற்றும் எதிர்ப்புத் தெரிவிப்பதற்கான கால அவகாசத்தை உடனடியாக நீட்டிக்க வேண்டும் என வலியுறுத்தப்பட்டுள்ளது.