8,000 ஊழியர்கள் பணிநீக்கம்? ... BMW அதிர்ச்சி அறிவிப்பு !

ஜெர்மனியைச் சேர்ந்த பிரபல ஆடம்பர வாகன தயாரிப்பு நிறுவனமான BMW, உலகளவில் நிலவும் மந்தமான பொருளாதாரச் சூழல் மற்றும் சீன நிறுவனங்களின் கடுமையான போட்டி காரணமாகத் தனது செலவுகளைக் குறைக்க முடிவு செய்துள்ளது. இதன் முதல்கட்டமாக வரும் 2027-ம் ஆண்டுக்குள் ஜெர்மனியில் உள்ள சுமார் 8,000 ஊழியர்களை பணிநீக்கம் செய்ய இருப்பதாக அதிகாரப்பூர்வமாக அறிவித்துள்ளது. நிர்வாகத் துறை மற்றும் ஆராய்ச்சித் துறையில் பணியாற்றும் ஊழியர்களுக்கு இந்த பணிநீக்க நடவடிக்கை முதன்மையாகப் பொருந்தும் எனத் தெரிவிக்கப்பட்டுள்ளது.

சமீபகாலமாக மின்சார வாகனங்களின் உற்பத்திச் செலவு கணிசமாக உயர்ந்துள்ளதும், அமெரிக்கா விதித்துள்ள கூடுதல் இறக்குமதி வரிகளும் வாகன உற்பத்தி நிறுவனங்களுக்குப் பெரும் சவாலாக மாறியுள்ளன. மேலும் சீனச் சந்தையில் உள்ளூர் நிறுவனங்களின் ஆதிக்கம் அதிகரித்து வருவதால், BMW நிறுவனத்தின் வாகன விற்பனை குறைந்து அதன் லாப வரம்பு பாதிக்கப்பட்டுள்ளது. இதன் காரணமாக நிறுவனத்தின் சீரான இயக்கத்தை உறுதி செய்ய ஊழியர்களின் எண்ணிக்கையைக் குறைக்க வேண்டிய கட்டாயம் ஏற்பட்டுள்ளதாக நிர்வாகத் தரப்பில் விளக்கமளிக்கப்பட்டுள்ளது.

தானாக முன்வந்து விலகும் விருப்ப ஓய்வுத் திட்டத்தின் அடிப்படையில் ஊழியர்களுக்குத் தேவையான இழப்பீட்டுத் தொகையை வழங்கி இந்தப் பணிநீக்கத்தை அமல்படுத்த திட்டமிட்டுள்ளனர். தொழிற்சாலைகளில் நேரடியாகப் பணிபுரியும் உற்பத்திப் பிரிவு ஊழியர்கள் பாதிக்கப்பட மாட்டார்கள் என்று உறுதியளிக்கப்பட்டுள்ளது. வாகனத் தொழில் துறையில் ஏற்பட்டுள்ள இந்தத் திடீர் மாற்றமும், முன்னணி நிறுவனமான BMW-வின் பணிநீக்க அறிவிப்பும் உலக அளவில் உள்ள வாகனச் சந்தையிலும் ஊழியர்கள் மத்தியிலும் பெரும் பரபரப்பை ஏற்படுத்தியுள்ளது.