வெடிகுண்டு மிரட்டல்.. இண்டிகோ விமானம் அவசரமாக தரையிறக்கம்!

உத்தரப்பிரதேசத்தில் இருந்து சவுதி அரேபியா நோக்கிச் சென்ற இண்டிகோ விமானத்தில் வெடிகுண்டு மிரட்டல் விடுக்கப்பட்டதைத் தொடர்ந்து, விமானம் அவசரமாகத் தரையிறக்கப்பட்டு தீவிர சோதனைக்கு உட்படுத்தப்பட்டுள்ளது.

உத்தரப்பிரதேச மாநிலம் லக்னோவிலிருந்து சவுதி அரேபியாவின் தம்மாம் நகருக்கு இண்டிகோ விமானம் ஒன்று புறப்பட்டுச் சென்றது. அந்தப் பயணத்தின்போது விமானத்திற்கு உள்ளே 'வெடிகுண்டு' என எழுதப்பட்ட ஒரு குறிப்பு கண்டுபிடிக்கப்பட்டது.

இதனையடுத்து உடனடியாக எச்சரிக்கையடைந்த விமானக் குழுவினர், முன்னெச்சரிக்கை நடவடிக்கையாக அந்த விமானத்தை அகமதாபாத் விமான நிலையத்திற்குத் திருப்பிச் செலுத்தி அவசரமாகத் தரையிறக்கினர்.

விமானம் தரையிறக்கப்பட்டதும் பாதுகாப்புப் படையினர் மற்றும் நிபுணர்கள் தீவிர சோதனையில் ஈடுபட்டனர். இறுதியில், அது வெறும் புரளி மற்றும் மிரட்டல் மட்டுமே என்றும், விமானத்தில் வெடிகுண்டு எதுவும் இல்லை என்றும் உறுதி செய்யப்பட்டது. இந்தச் சம்பவம் குறித்து அதிகாரிகள் தொடர்ந்து விசாரணை நடத்தி வருகின்றனர்.