நடிகை குஷ்பு வீட்டிற்கு வெடிகுண்டு மிரட்டல்: சென்னையில் பரபரப்பு!

பிரபல நடிகையும் பாஜக பிரமுகருமான குஷ்புவின் வீட்டிற்கு மின்னஞ்சல் மூலம் வெடிகுண்டு மிரட்டல் விடுக்கப்பட்ட சம்பவம் சென்னையில் பெரும் பரபரப்பை ஏற்படுத்தியுள்ளது.

சென்னை சாந்தோமில் உள்ள நடிகை குஷ்புவின் வீட்டில் வெடிகுண்டு வைக்கப்பட்டிருப்பதாக, தமிழக டிஜிபி அலுவலகத்தின் அதிகாரப்பூர்வ மின்னஞ்சல் முகவரிக்கு நேற்று ஒரு மிரட்டல் செய்தி வந்தது. இதனைப் பார்த்த உயர்மட்ட அதிகாரிகள் உடனடியாக உஷாரடைந்தனர்.

இதனைத் தொடர்ந்து, வெடிகுண்டு கண்டறியும் மற்றும் அகற்றும் நிபுணர்கள் மற்றும் மோப்ப நாய் உதவியுடன் போலீசார் குஷ்புவின் வீட்டிற்கு விரைந்தனர். வீட்டின் ஒவ்வொரு பகுதியிலும் பல மணி நேரம் அணு அணுவாகச் சோதனை நடத்தப்பட்டது. இறுதியில், சந்தேகத்திற்கிடமான எந்தப் பொருளும் கண்டெடுக்கப்படாததால், அந்த மிரட்டல் ஒரு 'வெறும் புரளி' என்பது உறுதி செய்யப்பட்டது.

கடந்த இரண்டு நாட்களுக்கு முன்புதான் பிரபல நடிகை திரிஷாவின் வீட்டிற்கும் இது போன்ற ஒரு மிரட்டல் விடுக்கப்பட்டிருந்தது குறிப்பிடத்தக்கது. அடுத்தடுத்து முன்னணி நடிகைகளின் வீடுகளுக்கு வரும் இத்தகைய மிரட்டல்களால் திரைத்துறையினரிடையே அச்சம் நிலவுகிறது.

மின்னஞ்சல் அனுப்பிய நபர் யார்? எந்த இடத்திலிருந்து இந்தத் தகவல் அனுப்பப்பட்டது? என்பது குறித்து சைபர் க்ரைம் போலீசார் வழக்குப்பதிவு செய்து தீவிர விசாரணை நடத்தி வருகின்றனர். வீண் வதந்திகளைப் பரப்பிப் பதற்றத்தை உருவாக்குபவர்கள் மீது கடுமையான நடவடிக்கை எடுக்கப்படும் எனத் தமிழகக் காவல்துறை எச்சரித்துள்ளது.