#BREAKING: தமிழகத்தில் மேலும் 4 மாவட்ட எஸ்.பி.க்களை இடமாற்றம் செய்து தேர்தல் ஆணையம் உத்தரவு

தமிழகச் சட்டமன்றத் தேர்தல் நியாயமான முறையிலும், எவ்வித அரசியல் தலையீடும் இன்றியும் நடைபெறுவதை உறுதி செய்ய, தேர்தல் ஆணையம் முக்கியக் காவல் அதிகாரிகளைப் பணியிட மாற்றம் செய்து வருகிறது. அந்த வகையில், இன்று மாலை நான்கு மாவட்டங்களுக்கான புதிய எஸ்.பி.க்கள் நியமிக்கப்பட்டுள்ளனர்.

ஏற்கனவே சில மாவட்ட அதிகாரிகள் மாற்றப்பட்ட நிலையில், இன்று வெளியான உத்தரவின்படி, காஞ்சிபுரம் மாவட்டம்: புதிய எஸ்.பி-யாக ஜவஹர் நியமிக்கப்பட்டுள்ளார். பெரம்பலூர் மாவட்டம்: புதிய எஸ்.பி-யாக பிரபாகர் நியமிக்கப்பட்டுள்ளார். தஞ்சாவூர் மாவட்டம்: புதிய எஸ்.பி-யாக சுந்தரவதனம் நியமிக்கப்பட்டுள்ளார். தென்காசி மாவட்டம்: புதிய எஸ்.பி-யாக மயில்வாகனன் நியமிக்கப்பட்டுள்ளார்.

தேர்தல் ஆணையத்தின் விதிகளின்படி, ஒரே மாவட்டத்தில் நீண்ட காலம் பணியாற்றுபவர்கள் அல்லது ஆளுங்கட்சிக்குச் சாதகமாகச் செயல்படுவதாகப் புகார்கள் எழும் அதிகாரிகள் பொதுவாக இடமாற்றம் செய்யப்படுவார்கள். சில நாட்களுக்கு முன்னர்தான் கரூர், ஈரோடு, நாகப்பட்டினம் மற்றும் விருதுநகர் ஆகிய 4 மாவட்டங்களின் எஸ்.பி.க்கள் மாற்றப்பட்டனர். தற்போது இரண்டாம் கட்டமாக மேலும் 4 மாவட்ட அதிகாரிகள் மாற்றப்பட்டிருப்பது, தேர்தல் களம் சூடுபிடித்துள்ளதைக் காட்டுகிறது.

புதிதாகப் பொறுப்பேற்கும் அதிகாரிகள் அந்தந்த மாவட்டங்களில் சட்டம்-ஒழுங்கைப் பாதுகாப்பதோடு, தேர்தல் நடத்தை விதிமுறைகளைத் தீவிரமாக அமல்படுத்த வேண்டும் எனத் தலைமைத் தேர்தல் அதிகாரி உத்தரவிட்டுள்ளார். குறிப்பாக, பணப்பட்டுவாடா மற்றும் பரிசுப் பொருட்கள் விநியோகத்தைத் தடுக்க இவர்களுக்குக் கூடுதல் பொறுப்புகள் வழங்கப்பட்டுள்ளன.