#BREAKING: தவெகவில் இணைந்தார் பிரபல திரைப்பட இயக்குநரும், தயாரிப்பாளருமான ஆர்.வி.உதயகுமார்!

சென்னை பனையூரில் உள்ள தமிழக வெற்றிக் கழகத்தின் தலைமை அலுவலகத்தில் மாற்றுக்கட்சிகளைச் சேர்ந்த முக்கியப் பிரமுகர்கள் மற்றும் தொண்டர்களின் இணைப்பு விழா இன்று  நடைபெற்று வரும் வேளையில், தமிழ் சினிமாவின் முன்னணி இயக்குநர்களில் ஒருவரான ஆர்.வி.உதயகுமார் தவெகவில் அதிகாரப்பூர்வமாக இணைந்துள்ளார். அரசியல் மற்றும் சினிமா வட்டாரங்களில் இந்தச் சேர்க்கை புதிய உத்வேகத்தை ஏற்படுத்தியுள்ளது.

'சின்ன கவுண்டர்', 'எஜமான்', 'பொன்னுமணி' உள்ளிட்ட பல சூப்பர் ஹிட் தமிழ் திரைப்படங்களை இயக்கியவரும், தென்னிந்தியத் திரைப்பட இயக்குநர்கள் சங்கத்தின் முன்னாள் தலைவருமான ஆர்.வி.உதயகுமார், இன்று பனையூர் அலுவலகத்திற்குத் தனது ஆதரவாளர்களுடன் நேரில் வருகை தந்து தவெகவில் தன்னை இணைத்துக் கொண்டார்.

அவருக்குத் தவெக தலைமை நிலைய நிர்வாகிகள் கட்சியின் சால்வை அணிவித்து, உறுப்பினர் அடையாள அட்டையை வழங்கி முறைப்படி கட்சியில் வரவேற்றனர். கட்சித் தலைவர் விஜய்யின் மக்கள் நலக் கொள்கைகள் மற்றும் தொலைநோக்குப் பார்வை தம்மைக் கவர்ந்ததே தவெகவில் இணைவதற்குக் காரணம் என அவர் தரப்பில் தெரிவிக்கப்பட்டுள்ளது.

இன்று காலை முதலே அதிமுக முன்னாள் அமைச்சர் கோமதி, நமது மக்கள் முன்னேற்றக் கழகத்தின் நிறுவனத் தலைவர் கெகநாத் மிஸ்ரா உள்ளிட்ட அரசியல் முக்கியப் புள்ளிகள் தவெகவில் இணைந்து வரும் நிலையில், தற்போது சினிமா துறையைச் சேர்ந்த மூத்த கலைஞர் ஆர்.வி.உதயகுமாரும் இணைந்துள்ளது கட்சியின் பலத்தை மேலும் அதிகரித்துள்ளது. வரும் சட்டமன்றத் தேர்தலை நோக்கிக் கட்டமைப்பை பலப்படுத்தி வரும் தவெகவின் இந்த அடுத்தடுத்த அதிரடி நகர்வுகள், தமிழக அரசியல் களத்தில் பெரும் விவாதத்தை ஏற்படுத்தியுள்ளன.