பிரிட்டன் ராணுவ ஹெலிகாப்டர் விபத்து; 3 வீரர்கள் பலி!

 By Seetha Jun 4, 2026, 10:40 IST
பிரிட்டன் ஹெலிகாப்டர் ராணுவ விபத்து பிரிட்டன் ஹெலிகாப்டர் ராணுவ விபத்து

பிரிட்டனின் டெவான் பகுதியில் உள்ள சோர்டன் டவுன் (Sourton Down) அருகே, ராயல் நேவிக்குச் சொந்தமான 'மெர்லின் எம்கே4' ஹெலிகாப்டர் திடீரென விபத்துக்குள்ளானதில் 3 கடற்படை வீரர்கள் சம்பவ இடத்திலேயே பரிதாபமாக உயிரிழந்தனர்.

பிரிட்டன் பாதுகாப்பு அமைச்சகம் வெளியிட்டுள்ள அதிகாரப்பூர்வ தகவல்களின்படி,  டார்ட்மூர் தேசியப் பூங்காவின் எல்லைப் பகுதியில் அமைந்துள்ள ஓகேஹாம்ப்டன் ராணுவப் பயிற்சி முகாம் அருகே, நேற்று அதிகாலை 4 மணியளவில் வீரர்கள் வழக்கமான இரவு நேரப் பயிற்சிப் பறப்பில் ஈடுபட்டிருந்த போது இந்த விபத்து நேரிட்டுள்ளது.

ஹெலிகாப்டர் வானில் பறந்து கொண்டிருந்த போது அதன் எஞ்சினில் இருந்து அசாதாரணமான மெக்கானிக்கல் சத்தங்கள் கேட்டதாகவும், அடுத்த சில நொடிகளில் எஞ்சின் முற்றிலும் செயலிழந்து, வானில் ஒரு பெரிய சிவப்பு நிற ஒளியுடன் ஹெலிகாப்டர் வயல்வெளியில் விழுந்து நொறுங்கி வெடித்ததாகவும் அப்பகுதி மக்கள் தெரிவித்துள்ளனர்.

ராயல் நேவியின் மிக முக்கியப் பிரிவான 'கமாண்டோ ஹெலிகாப்டர் ஃபோர்ஸ்' பிரிவைச் சேர்ந்த 3 வீரர்கள் பலியானதை அடுத்து, பிரிட்டன் அரசு தற்பொழுது ஆழ்ந்த இரங்கலைத் தெரிவித்துள்ளது.

விபத்தில் உயிரிழந்த வீரர்களின் குடும்பத்தினருக்குப் பிரதமர் கீர் ஸ்டார்மர் மற்றும் பிரிட்டன் பாதுகாப்புச் செயலாளர் ஜான் ஹீலி ஆகியோர் தங்களது ஆழ்ந்த இரங்கலைத் தெரிவித்துள்ளனர். மேலும், ராயல் நேவியின் தலைமைப் தளபதி ஜெனரல் க்வின் ஜென்கின்ஸ் (Gwyn Jenkins) விடுத்துள்ள செய்தியில், "இந்தத் துயரச் செய்தி ஒட்டுமொத்த கடற்படைக் குடும்பத்திற்கும் ஒரு மிகப்பெரிய அதிர்ச்சியாகும்; உயிரிழந்த வீரர்களின் குடும்பங்களுக்குத் தேவையான அனைத்து உதவிகளும் செய்யப்படும்" என்று குறிப்பிட்டுள்ளார்.

விபத்துக்குள்ளான 'மெர்லின் எம்கே4' (AW101 வகை) ஹெலிகாப்டர்கள் பொதுவாகப் பிரிட்டன் கடற்படையில் துருப்புகளை ஏற்றிச் செல்லவும், தேடுதல் மற்றும் மீட்புப் பணிகளுக்காகவும், நீர்மூழ்கி கப்பல் எதிர்ப்புப் போர்களுக்காகவும் பயன்படுத்தப்படும் அதிநவீன கனரக ஹெலிகாப்டராகும்.

தற்பொழுது விபத்து நடந்த இடத்தை ராணுவம் தனது கட்டுப்பாட்டிற்குள் கொண்டு வந்துள்ளதோடு, விபத்துக்கான துல்லியமான தொழில்நுட்பக் கோளாறுகள் அல்லது மோசமான வானிலை காரணமாக இந்த விபத்து நேரிட்டதா என்பது குறித்து பிரிட்டன் பாதுகாப்பு விபத்து விசாரணைப் பிரிவு தீவிர விசாரணையைத் தொடங்கியுள்ளது.