ஓடும் காரில் திடீர் தீ... எஞ்சினிலிருந்து புகை வெளியேறியதால் பெரும் பரபரப்பு!

தூத்துக்குடி மாவட்டம் கோவில்பட்டியைச் சேர்ந்த பாலாஜி என்பவர் தனது நண்பர்களுடன் மதுரை பாண்டி கோயிலுக்குச் சென்றுவிட்டு, காரில் ஊர் திரும்பிக் கொண்டிருந்தார். மதுரை - தூத்துக்குடி நெடுஞ்சாலையில் எட்டையபுரம் அருகே உள்ள குமாரகிரி கிராமத்தில் கார் வந்து கொண்டிருந்தபோது, திடீரென அதன் எஞ்சின் பகுதியில் இருந்து கதிர்வீச்சுப் புகை வெளியேறியது. இதனால் அதிர்ச்சியடைந்த அவர்கள், உடனடியாக சாலையோரம் காரை நிறுத்திவிட்டு கீழே இறங்கினர்.

அவர்கள் காரை விட்டு வெளியேறிய அடுத்த சில நிமிடங்களிலேயே, கார் முழுவதும் தீப்பிடித்துக் கொழுந்துவிட்டு எரியத் தொடங்கியது. காரில் பயணம் செய்த 4 பேரும் துரிதமாகச் செயல்பட்டு வெளியேறியதால், இந்த விபத்தில் நல்வாய்ப்பாக எந்தவித உயிர்ச் சேதமும் ஏற்படவில்லை. பெரும் விபத்தில் இருந்து அவர்கள் நூலிழையில் உயிர் தப்பிய சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இந்த விபத்து குறித்துத் தகவல் அறிந்து சம்பவ இடத்திற்கு விரைந்து வந்த தீயணைப்புத் துறையினர், நீண்ட நேரம் போராடி காரில் பற்றி எரிந்த தீயைக் கட்டுப்படுத்தினர். இருப்பினும் இந்தத் தீ விபத்தில் கார் முற்றிலும் எரிந்து சேதமடைந்தது. நெடுஞ்சாலையில் நிகழ்ந்த இந்தத் திடீர் தீ விபத்தால் அப்பகுதியில் சிறிது நேரம் போக்குவரத்து பாதிக்கப்பட்டதுடன், விபத்துக்கான காரணம் குறித்துக் காவல்துறையினர் தீவிர விசாரணை நடத்தி வருகின்றனர்.