கார் மரத்தில் மோதி வயலுக்குள் தலைகீழாகக் கவிழ்ந்து பேரன், பேத்தியுடன் தாத்தா சம்பவ இடத்திலேயே பரிதாப பலி!

விருதுநகர் மாவட்டம் சேத்தூர் கருப்பண்ண தேவர் தெருவைச் சேர்ந்தவர் வேலுச்சாமி வயது 51. இவர் அப்பகுதியில் பானிபூரி கடை ஒன்றை நடத்தி வந்துள்ளார். சம்பவத்தன்று இவரது மகள் பிரியதர்ஷினியின் பிறந்தநாளை வீட்டில் விமரிசையாகக் கொண்டாடி மகிழ்ந்துள்ளனர். அப்போது சமையல் எரிவாயு சிலிண்டர் தேவைப்பட்டதால், நள்ளிரவு 1 மணி அளவில் தனது காரில் சிவகிரி நோக்கி வேலுச்சாமி புறப்பட்டுள்ளார். அவருடன் காரில் செல்லும் உற்சாகத்தில் பேத்தி கீர்த்தி வயது 10, பேரன் ஹரி கைலாஷ் வயது 7 மற்றும் நண்பர்களான ராணுவ வீரர் வசந்த் வயது 23, முனியாண்டி வயது 40 ஆகியோரும் பயணித்துள்ளனர்.

காரை வேலுச்சாமி ஓட்டிய நிலையில், தென்காசி முதல் மதுரை செல்லும் சாலையில் சிவகிரி சோதனைச் சாவடி அருகே கார் சென்றுகொண்டிருந்தது. அப்போது ஓட்டுநரின் கட்டுப்பாட்டை முற்றிலுமாக இழந்த கார், சாலையோர மரத்தின் மீது மிகக் கொடூரமாக மோதி அருகிலுள்ள வயலுக்குள் பாய்ந்து தலைகீழாகக் கவிழ்ந்து விபத்துக்குள்ளானது. நள்ளிரவு நேரம் என்பதால் நீண்ட நேரமாக யாருக்கும் விபரம் தெரியாத நிலையில், அதிகாலையில் அந்த வழியாக வந்த லாரி ஓட்டுநர் கொடுத்த தகவலின் பேரில் சிவகிரி போலிசார் சம்பவ இடத்திற்கு விரைந்து வந்தனர்.

இந்த பயங்கர மோதலின் நேரடித் தாக்கத்தால் காரை ஓட்டிய தாத்தா வேலுச்சாமி, பச்சிளம் பேரன் ஹரி கைலாஷ் மற்றும் பேத்தி கீர்த்தி ஆகிய ஒரே குடும்பத்தைச் சேர்ந்த 3 பேரும் சம்பவ இடத்திலேயே பரிதாபமாக உயிரிழந்தனர். மேலும் காரில் பயணித்த முனியாண்டி மற்றும் ராணுவ வீரர் வசந்த் ஆகிய இருவர் பலத்த காயங்களுடன் மீட்கப்பட்டுத் தற்பொழுது அரசு மற்றும் தனியார் மருத்துவமனைகளில் தீவிரச் சிகிச்சையில் அனுமதிக்கப்பட்டுள்ளனர். பிறந்தநாள் கொண்டாட்டத்தின் நடுவே ஒரே குடும்பத்தைச் சேர்ந்த 3 பேர் பலியான இந்தச் சம்பவம், அந்தப் பகுதி ஏழை எளிய நுகர்வோர் பொதுமக்கள் மத்தியில் மிகப்பெரிய சோகத்தை ஏற்படுத்தியுள்ளது.