காவிரிப் படுகையில் மீண்டும் வெடிக்கும் அணை அரசியல் - "மேகதாது விவகாரத்தில் அமைதி காப்பது ஏன்?" கர்நாடகா எதிர்கட்சித் தலைவர் கேள்வி!

கர்நாடகாவில் மேகதாது அணை விவகாரத்தை முன்வைத்து தமிழ்நாடு-கர்நாடகா இடையேயான காவிரி நீர் விவாதம் மீண்டும் சூடுபிடிக்கத் தொடங்கியுள்ளது.

"தமிழக காங்கிரஸ் தலைவர்கள் மேகதாது அணைக்குக் கடும் எதிர்ப்பு தெரிவித்துள்ள நிலையில், கர்நாடக முதலமைச்சர் டி. கே. சிவக்குமார் இவ்விவகாரத்தில் தொடர்ந்து மவுனம் சாதிப்பது ஏன்?" என்று கர்நாடக சட்டப்பேரவை எதிர்க்கட்சித் தலைவரும் பாஜக மூத்த தலைவருமான ஆர். அசோக் இன்று பகிரங்கமாகக் கேள்வி எழுப்பியுள்ளார்.

பெங்களூருவில் இன்று செய்தியாளர்களைச் சந்தித்த ஆர். அசோக், கர்நாடகாவின் காங்கிரஸ் அரசுக்கு எதிராக முன்வைத்த முக்கியக் குற்றச்சாட்டுகளில், "மேகதாதுவில்  புதிய அணையைக் கட்டியே தீருவோம் எனப் பதவியேற்பின் போது முழங்கிய முதலமைச்சர் டி.கே.சிவக்குமார்,  அணை விவகாரத்தில் முழுமையாக அமைதி காத்து வருகிறார். தமிழகத்தில் உள்ள காங்கிரஸ் தலைவர்கள் தங்களது அரசியல் லாபத்திற்காக மேகதாது திட்டத்திற்கு எதிராகத் தொடர்ந்து குரல் கொடுத்து வருவதால், அவர்களுக்குப் பயந்து கொண்டு முதல்வர் சிவக்குமார் மவுனமாக இருக்கிறாரா?" என அவர் சாடியுள்ளார்.

அரசியல் நாடகம்: கர்நாடகாவில் உள்ள காங்கிரஸ் அரசு, தமிழகத்தில் உள்ள தங்களது தோழமைக் கட்சிகளின் உறவைக் காப்பாற்றுவதற்காகக் கர்நாடக மாநில மக்களின் குடிநீர் மற்றும் விவசாய நலன்களைப் பணையம் வைப்பதாக அவர் குற்றம்சாட்டியுள்ளார்.

காவிரி நடுவர் மன்றத் தீர்ப்பின் படி தமிழகத்திற்குரிய தண்ணீரைத் தடையின்றித் திறக்க வேண்டும் எனத் தமிழக அரசியல் கட்சிகள் வலியுறுத்தி வரும் வேளையில், மேகதாது அணை திட்டத்தை உடனே தொடங்க வேண்டும் எனப் பெங்களூருவில் உள்ள எதிர்க்கட்சிகள் தற்பொழுது நெருக்கடியை அதிகரிக்கத் தொடங்கியுள்ளன:

"மேகதாது அணை விவகாரத்தில் கர்நாடக அரசின் தற்போதைய அதிகாரப்பூர்வ நிலைப்பாடு என்ன என்பதை முதலமைச்சர் டி.கே.சிவக்குமார் உடனடியாகப் பொதுவெளியில் வெளிப்படையாக அறிவிக்க வேண்டும். அண்டை மாநிலத் தலைவர்களின் எதிர்ப்புகளுக்குப் பணிந்து போகாமல், கர்நாடகாவின் உரிமைகளைப் பாதுகாக்கவும், அணை கட்டுமானப் பணிகளுக்கான அடுத்தகட்ட சட்டப் பணிகளைத் துரிதப்படுத்தவும் மாநில அரசு உடனடியாக முன்வர வேண்டும்."

தமிழ்நாட்டில் தவெக மற்றும் திமுக இடையேயான அரசியல் யுத்தம், காங்கிரஸ் கட்சியின் தற்போதைய புதிய தவெக ஆதரவு நிலைப்பாடு எனப் பல்வேறு உள்நாட்டு அரசியல் மாற்றங்கள் விவாதிக்கப்பட்டு வரும் வேளையில், கர்நாடகாவிலிருந்து கிளம்பியுள்ள இந்த மேகதாது அணை விவகாரம் காவிரி டெல்டா மாவட்ட விவசாயிகளிடையே தற்பொழுது கூடுதல் கவலையை ஏற்படுத்தியுள்ளது.

இரு மாநிலங்களுக்கு இடையேயான நதிநீர் பங்கீட்டுப் பிரச்சினையில் கர்நாடக எதிர்க்கட்சித் தலைவர் தற்பொழுது நேரடியாகக் களமிறங்கியிருப்பது, வரவிருக்கும் நாட்களில இரு மாநில எல்லைப் பகுதிகளிலும், சட்டமன்றக் கூட்டத்தொடர்களிலும் புதிய விவாதப் புயலைக் கிளப்பும் என எதிர்பார்க்கப்படுகிறது.