தவெக தலைவர் விஜய்யிடம் சிபிஐ விசாரணை நிறைவு!

டெல்லியில் பரபரப்பு: த.வெ.க. தலைவர் விஜயிடம் 4 மணி நேரம் சி.பி.ஐ. விசாரணை! 80-க்கும் மேற்பட்ட கேள்விகளால் துளைப்பு
புதுடெல்லி: கரூர் துயர சம்பவம் தொடர்பாக, தமிழக வெற்றிக் கழகத் தலைவர் விஜயிடம் டெல்லியில் உள்ள சி.பி.ஐ. அலுவலகத்தில் இன்று 4 மணி நேரத்திற்கும் மேலாக விசாரணை நடத்தப்பட்டது.

த.வெ.க. தலைவர் விஜய் இன்று காலை 6:20 மணியளவில் சென்னை நீலாங்கரையில் உள்ள தனது இல்லத்தில் இருந்து புறப்பட்டு, காலை 7:10 மணிக்கு சென்னை விமான நிலையத்தை வந்தடைந்தார். அங்கிருந்து விமானம் மூலம் டெல்லி சென்ற அவர், ஐ.டி.சி மவுரியா ஹோட்டலில் தங்கி தன்னைத் தயார்படுத்திக் கொண்டார். பின்னர், அங்கிருந்து கார் மூலம் சி.பி.ஐ. அலுவலகத்திற்கு நேரில் ஆஜராக விரைந்தார்.

சி.பி.ஐ. அலுவலகத்தில் நான்கு அதிகாரிகள் அடங்கிய குழுவினர் விஜயிடம் மட்டும் தனியாக விசாரணை நடத்தினர். இந்த விசாரணை சுமார் 4 மணி நேரம் நீடித்தது. இதில் விஜயை நோக்கி 80-க்கும் மேற்பட்ட கேள்விகளை அதிகாரிகள் எழுப்பியதாகத் தகவல்கள் வெளியாகியுள்ளன. விசாரணை முடிந்து தற்போது விஜய் சி.பி.ஐ. அலுவலகத்தில் இருந்து வெளியேறியுள்ளார்.

கரூர் துயர சம்பவம் தொடர்பாக நடைபெற்ற இந்த விசாரணையில், சி.பி.ஐ. அதிகாரிகள் சில முக்கியக் கேள்விகளை முன்வைத்ததாகத் தெரிகிறது:

"கூட்டத்தில் மக்கள் மயக்கமடைந்து விழுந்த பிறகும், நீங்கள் ஏன் உங்கள் பேச்சை நிறுத்தாமல் தொடர்ந்தீர்கள்?"

"நிர்ணயிக்கப்பட்ட நேரத்தைத் தாண்டி கூட்டத்திற்குத் தாமதமாக வந்தது ஏன்?"

"கூட்ட நெரிசலைத் தவிர்க்கவும், பாதுகாப்பு ஏற்பாடுகளைச் செய்யவும் என்னென்ன நடவடிக்கைகள் எடுக்கப்பட்டன?"

விஜய் கட்சி தொடங்கிய பிறகு நடைபெறும் இந்த முதல் சி.பி.ஐ. விசாரணை, தமிழக அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. இந்த விசாரணையின் பின்னணியில் கரூர் சம்பவம் குறித்த பல்வேறு முக்கியத் தரவுகளை சி.பி.ஐ. அதிகாரிகள் சேகரித்துள்ளதாகக் கூறப்படுகிறது.

விசாரணை முடிந்த நிலையில், இது குறித்து தமிழக வெற்றிக் கழகத்தின் தரப்பில் இருந்து அதிகாரப்பூர்வ அறிக்கை எதுவும் வெளியாகுமா என்பதை அக்கட்சித் தொண்டர்கள் ஆவலுடன் எதிர்பார்த்துக் காத்துள்ளனர்.