ஆன்-ஸ்கிரீன் மார்க்கிங் ... சிபிஎஸ்இ விடைத்தாள் மதிப்பீட்டு சர்ச்சை!
மத்திய கல்வி வாரியமான சிபிஎஸ்இ பன்னிரண்டாம் வகுப்பு பொதுத்தேர்வு விடைத்தாள்களை மதிப்பீடு செய்ய அறிமுகப்படுத்திய 'ஆன்-ஸ்கிரீன் மார்க்கிங்' என்ற புதிய டிஜிட்டல் முறை மாணவர்கள் மற்றும் பெற்றோர்கள் மத்தியில் பெரும் அதிருப்தியை ஏற்படுத்தியுள்ளது. விடைத்தாள்களை நேரடியாகத் திருத்தாமல் கணினி மூலம் ஸ்கேன் செய்து மதிப்பீடு செய்ததால் மதிப்பெண்கள் கணிசமாகக் குறைந்துள்ளதாகப் புகார்கள் எழுந்தன. இந்த டிஜிட்டல் மதிப்பீட்டு முறையினால் தேர்ச்சி விகிதம் கடந்த ஆண்டை விட மூன்று சதவீதம் வரை சரிவடைந்துள்ளதாகப் பள்ளித் தலைவர்கள் தங்களது கவலையை வெளிப்படுத்தியுள்ளனர்.
இந்த விவகாரம் பூதாகரமானதைத் தொடர்ந்து, ஆன்லைன் விடைத்தாள் திருத்தும் முறை குறித்து எழுந்துள்ள சந்தேகங்களுக்கு மத்திய கல்வி அமைச்சகமும் சிபிஎஸ்இ நிர்வாகமும் விரிவான விளக்கமளித்துள்ளன. விடைத்தாள்களை ஆசிரியர்கள் கைகளால் திருத்துவதற்குப் பதிலாக, கணினியில் பார்த்து திருத்தும் முறை மட்டுமே மாற்றப்பட்டுள்ளதே தவிர மதிப்பெண் வழங்கும் விதிகளில் எந்த மாற்றமும் செய்யப்படவில்லை என அதிகாரிகள் தெளிவுபடுத்தியுள்ளனர். மேலும், ஸ்கேன் செய்ததில் மை வெளிச்சம் குறைவாக இருந்த பதின்மூன்றாயிரத்திற்கும் மேற்பட்ட விடைத்தாள்கள் தனியாகப் பிரிக்கப்பட்டு, அவை அனைத்தும் கைகளால் நேரடியாகத் திருத்தப்பட்டு மதிப்பெண்கள் வழங்கப்பட்டுள்ளதாக மத்திய அரசு தெரிவித்துள்ளது.
மாணவர்கள் மற்றும் பெற்றோர்களின் மன உளைச்சலைக் குறைக்கும் நோக்கில், விடைத்தாள்களை மறுசரிபார்ப்பு மற்றும் மறுமதிப்பீடு செய்வதற்கான கட்டணங்களை மத்திய அரசு அதிரடியாகக் குறைத்துள்ளது. இதன்படி பன்னிரண்டாம் வகுப்பு மாணவர்கள் தங்களது விடைத்தாளின் ஸ்கேன் நகலைப் பெறவும், மதிப்பெண்களை மறுசரிபார்ப்பு செய்யவும் இனி வெறும் நூறு ரூபாய் மட்டும் செலுத்தினால் போதுமானது என அறிவிக்கப்பட்டுள்ளது. கல்வி முறையில் வெளிப்படைத்தன்மையை அதிகரிக்கவும், புவியியல் எல்லைகளைக் கடந்து சீரான முறையில் விடைத்தாள்களை மதிப்பீடு செய்யவும் இந்த டிஜிட்டல் தொழில்நுட்ப முறை பெரிதும் உதவுவதாக அதிகாரிகள் தங்களது விளக்கத்தில் குறிப்பிட்டுள்ளனர்.