கேப்டன் விஜயகாந்த் நினைவிடத்தில் வெற்றிச் சான்றிதழ்.. எம்பி-யாகப் பதவியேற்கும் முன் சுதீஷ் செய்த நெகிழ்ச்சி காரியம்!

தமிழகத்தில் நடைபெற்று முடிந்த மாநிலங்களவைத் தேர்தலில், திமுக கூட்டணி சார்பில் போட்டியிட்டுப் போட்டியின்றித் தேர்வான தேமுதிக பொருளாளர் எல்.கே. சுதீஷ், தனது வெற்றியைத் தேமுதிக நிறுவனர் மறைந்த 'கேப்டன்' விஜயகாந்திற்குச் சமர்ப்பித்துள்ளார். 

தேமுதிக வரலாற்றில் ஒரு முக்கியத் மைல்கல்லாக, அக்கட்சியின் பொருளாளர் எல்.கே. சுதீஷ் முதல்முறையாக மாநிலங்களவை உறுப்பினராகத் தேர்ந்தெடுக்கப்பட்டுள்ளார். வெற்றிச் சான்றிதழைப் பெற்றுக் கொண்டு சென்னை கோயம்பேட்டில் உள்ள தேமுதிக தலைமை அலுவலகத்திற்கு வந்த அவருக்கு, கட்சி நிர்வாகிகள் மற்றும் தொண்டர்கள் பட்டாசு வெடித்து, பூங்கொத்து கொடுத்து உற்சாக வரவேற்பு அளித்தனர்.

நேராகத் தலைமை அலுவலக வளாகத்தில் உள்ள விஜயகாந்த் நினைவிடத்திற்குச் சென்ற சுதீஷ், தனது வெற்றிச் சான்றிதழை அங்கு வைத்து வணங்கினார். பின்னர் கேப்டனின் சிலைக்கு மாலை அணிவித்துத் தனது மரியாதையைச் செலுத்தினார். தனது அரசியல் பயணத்தின் மிக முக்கியமான இந்த வெற்றியைத் தொண்டர்களுடனும் பொதுமக்களுடனும் கொண்டாடினார். இனிப்புகளை வழங்கித் தனது மகிழ்ச்சியை வெளிப்படுத்திய அவர், கேப்டன் காட்டிய வழியில் நாடாளுமன்றத்தில் தமிழகத்தின் குரலாக ஒலிப்பேன் என உறுதி பூண்டுள்ளார்.

திமுக கூட்டணியில் தேமுதிக இணைந்த பிறகு கிடைத்துள்ள இந்த அங்கீகாரம், வரவிருக்கும் சட்டமன்றத் தேர்தலுக்கு முன்னதாக அக்கட்சியினரிடையே பெரும் உற்சாகத்தை ஏற்படுத்தியுள்ளது. விஜயகாந்த் மறைவிற்குப் பிறகு தேமுதிகவிற்கு கிடைத்துள்ள இந்த ஒரு எம்பி பதவி, டெல்லி அரசியலில் அக்கட்சியின் இருப்பை உறுதி செய்யும் என எதிர்பார்க்கப்படுகிறது.