ஓடும் ரயிலில் ஏற முயன்றபோது தவறி விழுந்த பயணி... நொடியில் உயிரைக் காப்பாற்றிய காவலர்! CCTV காட்சிகள் வைரல்!
சென்னை: சென்னை எழும்பூர் ரயில் நிலையத்தில் ஓடும் ரயிலில் ஏற முயன்ற பயணி ஒருவர் எதிர்பாராதவிதமாக கால் தவறி கீழே விழுந்து, ரயிலுக்கும் நடைமேடைக்கும் இடையே சிக்கிய சம்பவம் பரபரப்பை ஏற்படுத்தியது. அப்போது பணியில் இருந்த RPSF காவலர் ஒருவர் துரிதமாக செயல்பட்டு பயணியின் உயிரை காப்பாற்றினார்.
சென்னை எழும்பூர் ரயில் நிலையத்தில் ரயில் ஒன்று புறப்பட்டுச் சென்று கொண்டிருந்தது. அப்போது பயணி ஒருவர் ஓடும் ரயிலில் ஏற முயன்றதாக கூறப்படுகிறது. எதிர்பாராதவிதமாக நிலைதடுமாறி அவர் நடைமேடையில் விழுந்தார்.ரயிலுக்கும் நடைமேடைக்கும் இடையே சிக்கிய அவர், ஆபத்தான நிலையில் தொங்கியபடி இருந்தார். இதனை அங்கு பாதுகாப்புப் பணியில் ஈடுபட்டிருந்த RPSF காவலர் கவனித்தார்.
நிலைமையின் தீவிரத்தை உணர்ந்த காவலர், உடனடியாக சம்பவ இடத்திற்கு விரைந்து சென்று, சமயோசிதமாக செயல்பட்டு பயணியை பிடித்து மேலே இழுத்தார். இதன் மூலம் ரயிலுக்கும் நடைமேடைக்கும் இடையே சிக்கியிருந்த பயணி பத்திரமாக மீட்கப்பட்டார்.காவலர் துரிதமாக செயல்படாமல் இருந்திருந்தால் பயணியின் உயிருக்கு பெரும் ஆபத்து ஏற்பட்டிருக்கக்கூடிய சூழல் நிலவியது. சில நொடிகளில் மேற்கொள்ளப்பட்ட அவரது துரித நடவடிக்கை காரணமாக பெரும் விபத்து தவிர்க்கப்பட்டது.
இந்த சம்பவம் தொடர்பான சிசிடிவி காட்சிகள் தற்போது வெளியாகி சமூக வலைதளங்களில் கவனம் பெற்றுள்ளன. அதில், ஆபத்தான நிலையில் சிக்கிய பயணியை RPSF காவலர் விரைந்து சென்று மீட்கும் காட்சிகள் இடம்பெற்றுள்ளதாக கூறப்படுகிறது.பயணியின் உயிரை காப்பாற்றிய RPSF காவலரின் துரிதமான செயலுக்கு பொதுமக்கள் பலரும் பாராட்டு தெரிவித்து வருகின்றனர். ஓடும் ரயிலில் ஏறுவது போன்ற ஆபத்தான செயல்களை பயணிகள் தவிர்க்க வேண்டும் என்றும், ரயில் புறப்படும் முன்பே பாதுகாப்பாக ரயிலில் ஏறி பயணம் செய்ய வேண்டும் என்றும் அறிவுறுத்தப்படுகிறது.