இன்று திருச்சி செல்கிறார் முதல்வர் விஜய்... ட்ரோன்கள் பறக்கத் தடை, போக்குவரத்து மாற்றம்!

இன்று முதல்வர் விஜய் திருச்சி செல்ல உள்ள நிலையில், திருச்சி மாநகரக் காவல் எல்லைக்குட்பட்ட பகுதிகளில் இன்று ட்ரோன்கள் மற்றும் இதர ஆளில்லா வான்வழி வாகனங்கள் பறப்பதற்கு மாவட்ட நிர்வாகம் தடை விதித்துள்ளது. இந்தத் தடையை மீறி எவரேனும் வான்வழி வாகனங்களைப் பறக்கவிட்டால் அவர்கள் மீது சட்டப்படி கடுமையான நடவடிக்கை எடுக்கப்படும் என்றும் காவல்துறை எச்சரித்துள்ளது.

முதலமைச்சரின் வாகனப் பேரணி மற்றும் அவர் பங்கேற்கும் விழாக்கள் தடையின்றி நடைபெறுவதற்காகத் திருச்சி மாநகரின் முக்கிய சாலைகளில் இன்று காலை முதலே போக்குவரத்து மாற்றங்கள் செய்யப்பட்டுள்ளன. அதன்படி தஞ்சாவூர் மற்றும் புதுக்கோட்டை மார்க்கமாக திருச்சிக்குள் வரும் கனரக வாகனங்கள் மாற்றுப் பாதைகளில் திருப்பி விடப்பட உள்ளன. பொதுமக்கள் மற்றும் அவசரக் கால வாகனங்களுக்கு எவ்வித இடையூறும் ஏற்படாத வண்ணம் இந்த ஒழுங்குமுறை நடவடிக்கைகள் திட்டமிடப்பட்டுள்ளன.

முக்கியச் சாலைகளில் போக்குவரத்து நெரிசலைத் தவிர்ப்பதற்காக நகரின் பல்வேறு இடங்களில் கூடுதல் காவல்துறையினர் பணியில் ஈடுபடுத்தப்பட உள்ளனர். முதலமைச்சர் கலந்துக் கொள்ளும் விழா நடைபெறும் மைதானம் மற்றும் அதனைச் சுற்றியுள்ள பகுதிகள் அனைத்தும் காவல்துறையின் முழுக் கட்டுப்பாட்டிற்குள் கொண்டு வரப்பட்டுள்ளன. எனவே இன்று திருச்சி மாநகரப் பகுதிக்கு வாகனங்களில் வரும் பொதுமக்கள் இந்த மாற்றங்களை அறிந்து தங்களின் பயணத்தைத் திட்டமிடுமாறு கேட்டுக்கொள்ளப்பட்டுள்ளனர்.