காய்ச்சல் மருந்தால் விபரீதம்... பிறந்து 42 நாட்களே ஆன ஆண் குழந்தை மூச்சுத் திணறிப் பரிதாப உயிரிழப்பு... கதறித் துடித்த பெற்றோர்!

சேலம் மாவட்டம் எடப்பாடி ஒன்றியம் குட்டச்சிவளவு பகுதியைச் சேர்ந்த சசிகுமார் என்பவரின் மனைவி சித்ரா ஆவார். இந்தத் தம்பதியருக்குக் கடந்த 42 நாட்களுக்கு முன்புதான் அழகான ஆண் குழந்தை ஒன்று பிறந்து வீட்டில் அனைவரும் மிகுந்த மகிழ்ச்சியுடன் இருந்துள்ளனர். இந்நிலையில் அந்தக் குழந்தைக்குக் கடந்த 2 நாட்களாகத் தொடர்ந்து கடுமையான காய்ச்சல் பாதிப்பு இருந்ததாகக் கூறப்படுகிறது. இதற்காகப் பெற்றோர் குழந்தைக்கு வீட்டிலேயே காய்ச்சல் வராமல் தடுப்பதற்கான மருந்துகளைக் கொடுத்துப் பராமரித்து வந்துள்ளனர்.

நேற்று காலை தாய் சித்ரா தனது ஆண் குழந்தைக்குக் காய்ச்சல் மருந்தினை வழக்கம்போலக் கொடுத்துள்ளார். அப்போது எதிர்பாராத விதமாகக் காய்ச்சல் மருந்து தொண்டையில் சிக்கியதால் குழந்தைக்குக் கடுமையான மூச்சுத் திணறல் பாதிப்பு ஏற்பட்டுள்ளது. இதனால் குழந்தை மூச்சு விட முடியாமல் துடித்ததைக் கண்டு அதிர்ச்சியடைந்த பெற்றோர், உடனடியாகக் குழந்தையை மீட்டு சிகிச்சைக்காக அருகில் உள்ள அரசு மருத்துவமனைக்கு அவசரமாகக் கொண்டு சென்றனர்.

அங்கு வந்த குழந்தையைத் தீவிரமாகப் பரிசோதித்த அரசு மருத்துவர்கள், குழந்தை வரும் வழியிலேயே பரிதாபமாக உயிரிழந்து விட்டதை உறுதி செய்து பெற்றோருக்குத் தெரிவித்தனர். பிறந்து 42 நாட்களே ஆன தங்களின் பச்சிளம் ஆண் குழந்தை காய்ச்சல் மருந்து கொடுத்த போது மூச்சுத் திணறி உயிரிழந்த இச்சம்பவம் சசிகுமார் குடும்பத்தினர் மற்றும் உறவினர்களிடையே ஈடு செய்ய முடியாத மாபெரும் சோகத்தையும் கண்ணீரையும் ஏற்படுத்தியுள்ளது.