மின் கம்பியில் பாம்பு போல ஊர்ந்து செல்லும் ரோபோ! சீனாவின் புதிய தொழில்நுட்பம் ஆச்சரியம்!
மின் கம்பிகளில் பாம்பைப் போல ஊர்ந்து சென்று, மின் இணைப்புகளில் ஏற்படும் பழுதுகளை கண்டறியும் புதிய ரோபோவை சீனா உருவாக்கியுள்ளது. மனிதர்கள் சென்று ஆய்வு செய்ய சிரமமான மின் கம்பிகளை தானாகவே கண்காணிக்கும் இந்த தொழில்நுட்பம் தற்போது கவனம் பெற்றுள்ளது.சீனாவின் யுனான் மாகாணத்தில் உள்ள குன்மிங் பகுதியில் இந்த பாம்பு வடிவ ரோபோ மூலம் மின் விநியோகக் கம்பிகள் ஆய்வு செய்யப்பட்டு வருகின்றன. 10 கிலோவோல்ட் மின் கம்பிகளில் தானாக நகரும் வகையில் இது வடிவமைக்கப்பட்டுள்ளது.
பாம்பைப் போல நெகிழ்வான உடல் அமைப்பைக் கொண்ட இந்த ரோபோ, மின் கம்பியைச் சுற்றிப் பிடித்தபடி முன்னோக்கி நகர்கிறது. வழியில் உள்ள தடைகளை கண்டறிந்து, தனது உடல் அமைப்பை மாற்றி அவற்றைக் கடந்து செல்லும் திறனும் இதற்கு உள்ளது. இன்சுலேட்டர்கள் உள்ளிட்ட தடைகளையும் கடக்க முடியும் என தெரிவிக்கப்பட்டுள்ளது.
இந்த ரோபோவில் உயர் தெளிவுத்திறன் கொண்ட கேமரா, அகச்சிவப்பு வெப்பப் படக்கருவி மற்றும் பல்வேறு சென்சார்கள் பொருத்தப்பட்டுள்ளன. இவற்றின் உதவியுடன் மின் கம்பிகளில் ஏற்படும் சேதம், கம்பி தேய்மானம், அதிக வெப்பம் உள்ளிட்ட பிரச்சினைகளை கண்டறிய முடியும்.மேலும், மின் கம்பியின் வெப்பநிலையையும் தொடர்ந்து கண்காணித்து, அதிக வெப்பம் ஏற்பட்டால் எச்சரிக்கை வழங்கும் வசதியும் இதில் உள்ளது. இதனால் மின் விநியோகத்தில் பெரிய பிரச்சினைகள் ஏற்படுவதற்கு முன்பே சாத்தியமான பழுதுகளை கண்டறிய முடியும்.
பொதுவாக மின் கம்பிகளை ஆய்வு செய்ய ஊழியர்கள் அல்லது ட்ரோன்கள் பயன்படுத்தப்படுகின்றன. ஆனால், ட்ரோன்களைப் பயன்படுத்த முடியாத பகுதிகளிலும், மனிதர்கள் நேரடியாகச் சென்று ஆய்வு செய்வது ஆபத்தான இடங்களிலும் இந்த ரோபோ உதவியாக இருக்கும் என தெரிவிக்கப்பட்டுள்ளது.இந்த பாம்பு வடிவ ரோபோ ஏற்கனவே 130 கிலோமீட்டருக்கும் அதிகமான மின் விநியோகக் கம்பிகளை ஆய்வு செய்துள்ளதாக தகவல்கள் தெரிவிக்கின்றன. மனிதர்கள் மேற்கொள்ளும் ஆய்வை விட சுமார் 3 மடங்கு வேகமாக பணிகளை மேற்கொள்ள முடியும் என்றும் கூறப்படுகிறது.
மேலும், ரோபோவின் பின்பகுதியில் மின் கம்பியில் இருந்தே மின்சாரத்தைப் பெறும் தொழில்நுட்பமும் பயன்படுத்தப்பட்டுள்ளது. இதன் மூலம் நீண்ட நேரம் தொடர்ந்து மின் கம்பிகளை கண்காணிக்க முடியும் என சீனாவின் மின் துறை அதிகாரிகள் தெரிவித்துள்ளனர்.மின் கட்டமைப்புகளின் பராமரிப்பில் மனிதர்களின் பணிச்சுமையையும் ஆபத்தையும் குறைக்கும் வகையில் உருவாக்கப்பட்டுள்ள இந்த ‘ரோபோ பாம்பு’ தொழில்நுட்பம், எதிர்காலத்தில் மின் விநியோகத் துறையில் முக்கிய பங்கு வகிக்கக்கூடும் என எதிர்பார்க்கப்படுகிறது.