10-ம் வகுப்பு தேர்வு முடிவுகள் வெளியானது... 94.31% பேர் தேர்ச்சி... அதிகளவிலான மாணவிகள் தேர்ச்சி!

 By Seetha May 20, 2026, 09:50 IST
தேர்வுமுடிவுகள் பொதுத்தேர்வு தேர்வு மாணவிகள் செல்போன் தேர்வுமுடிவுகள் பொதுத்தேர்வு தேர்வு மாணவிகள் செல்போன்

தமிழகத்தில் பெரும் எதிர்பார்ப்புக்கு மத்தியில் 2025-26-ம் கல்வியாண்டுக்கான 10-ம் வகுப்பு பொதுத்தேர்வு முடிவுகள் இன்றுகாலை வெளியிடப்பட்டன. இந்த ஆண்டு ஒட்டுமொத்த தேர்ச்சி விகிதம் 94.31 சதவீதமாகப் பதிவாகி அசத்தியுள்ளது. வழக்கம் போல இந்த ஆண்டும் மாணவர்களை விட மாணவிகளே அதிக அளவில் தேர்ச்சி பெற்று சாதனை படைத்துள்ளனர்.

சென்னை கோட்டூர்புரம், அறிஞர் அண்ணா நூற்றாண்டு நூலக வளாகத்தில் நடைபெற்ற செய்தியாளர்கள் சந்திப்பில், புதிய பள்ளிக்கல்வித்துறை அமைச்சர் ராஜ்மோகன் 10-ம் வகுப்பு பொதுத்தேர்வு முடிவுகளை முறைப்படி வெளியிட்டார். நடப்பு கல்வியாண்டில் சுமார் 9 லட்சம் மாணவ-மாணவியர் இந்த பொதுத்தேர்வை எழுதியிருந்த நிலையில், தேர்வு முடிவுகள் வெளியான நொடி முதலே இணையதளங்கள் மற்றும் மொபைல் எண்களில் மதிப்பெண்களைப் பார்க்கும் வேகம் அதிகரித்துள்ளது.

தேர்வு முடிவுகள் பொதுத்தேர்வு ரிசல்ட்

பொதுத்தேர்வு எழுதிய சுமார் 9 லட்சம் மாணவர்களில், மொத்தம் 8,21,105 பேர் தேர்ச்சி பெற்றுள்ளனர். இதன் ஒட்டுமொத்த தேர்ச்சி விகிதம் 94.31% ஆகும். இது கடந்த ஆண்டின் தேர்ச்சி விகிதத்தை விட (93.80%) அதிகம் என்பது குறிப்பிடத்தக்கது. இந்த ஆண்டும் மாணவர்களைப் பின்னுக்குத் தள்ளி மாணவிகளே முதலிடம் பிடித்துள்ளனர். தேர்வு எழுதிய மாணவிகளில் 96.47% பேர் தேர்ச்சி பெற்று சாதனை படைத்துள்ளனர்.

மாணவிகளுக்கு இணையாகக் கடுமையான போட்டி கொடுத்த மாணவர்கள் தரப்பில் இந்த ஆண்டு 92.15% பேர் தேர்ச்சி பெற்றுள்ளனர். மாணவர்கள் தங்களின் தேர்வுப் பதிவு எண் மற்றும் பிறந்த தேதி ஆகியவற்றை உள்ளிட்டு www.tnresults.nic.in, www.dge.tn.gov.in மற்றும் results.digilocker.gov.in ஆகிய இணையதள முகவரிகளில் தங்களின் மதிப்பெண்களைத் தெரிந்து கொள்ளலாம்.

தேர்வு பொதுத்தேர்வு முடிவுகள்

இதுதவிர, பள்ளிகளில் சமர்ப்பிக்கப்பட்ட செல்போன் எண்களுக்குக் குறுஞ்செய்தி வாயிலாகவும், இந்த ஆண்டு அறிமுகப்படுத்தப்பட்டுள்ள புதிய வசதியான வாட்ஸ்-அப் செயலி மூலமாகவும் முடிவுகள் உடனுக்குடன் அனுப்பப்பட்டு வருகின்றன. மாணவர்கள் தாங்கள் பயின்ற பள்ளிகளுக்கு நேரில் சென்றும் தேர்வு முடிவுகளைப் பார்த்துக் கொள்ளலாம்.

தேர்ச்சியில் முத்திரை பதித்த மாணவச் செல்வங்களுக்கும், அவர்களுக்குப் உறுதுணையாக இருந்த ஆசிரியர்கள் மற்றும் பெற்றோர்களுக்கும் பள்ளிக்கல்வித்துறை சார்பாகவும், பல்வேறு அரசியல் தலைவர்கள் சார்பாகவும் வாழ்த்துகள் குவிந்து வருகின்றன.