கனிமவள லாரிகளில் ஜி.பி.எஸ். கருவி பொருத்துவதில் கோவை முதலிடம்! 4,200 லாரிகளில் கண்காணிப்பு வசதி

தமிழகத்தில் கனிம வளங்களை ஏற்றிச் செல்லும் லாரிகளில் ஜி.பி.எஸ். கருவி பொருத்துவதில் கோவை மாவட்டம் முதலிடத்தைப் பிடித்துள்ளது. கோவை மாவட்டத்தில் கனிம வளங்களை ஏற்றிச் செல்லும் சுமார் 7,000 லாரிகள் உள்ள நிலையில், இதுவரை 4,200 லாரிகளில் ஜி.பி.எஸ். கருவிகள் பொருத்தப்பட்டுள்ளன.

கனிம வளக் கடத்தலைத் தடுக்க நடவடிக்கை

கோவை மாவட்டம் தமிழக-கேரள எல்லையில் அமைந்துள்ளது. கோவை-கேரள எல்லையில் 13 சோதனைச்சாவடிகள் உள்ளன. இந்த வழியாக கற்கள், ஜல்லி, செம்மண் உள்ளிட்ட கனிம வளங்கள் கேரளாவுக்குக் கடத்தப்படுவதாகப் புகார்கள் எழுந்துள்ளன. இதனைத் தடுக்க கனிமவளத்துறை, வருவாய்த்துறை மற்றும் போலீசார் இணைந்து நடவடிக்கை எடுத்து வருகின்றனர்.

மாத இறுதிக்குள் ஜி.பி.எஸ். பொருத்த இலக்கு

கனிம வளங்களை ஏற்றிச் செல்லும் லாரிகளில் கட்டாயம் ஜி.பி.எஸ். கருவி பொருத்த வேண்டும் என தமிழக அரசு உத்தரவிட்டுள்ளது. இதற்கான காலக்கெடுவுக்குள் அனைத்து லாரிகளிலும் கருவிகளைப் பொருத்த நடவடிக்கை எடுக்கப்பட்டு வருகிறது. கோவையில் இதுவரை 4,200 லாரிகளில் கருவிகள் பொருத்தப்பட்டுள்ள நிலையில், மீதமுள்ள லாரிகளிலும் மாத இறுதிக்குள் பொருத்தும் பணிகள் தீவிரப்படுத்தப்பட்டுள்ளன.