உலக சாதனைக்கு அருகில் ஸ்மிருதி மந்தனா, ஷபாலி வர்மா - குவியும் வாழ்த்துகள்!

ஜிம்பாப்வே அணிக்கு எதிரான இரண்டாவது டி20 கிரிக்கெட் போட்டியில் இந்திய மகளிர் அணி இன்று களமிறங்குகிறது. ஏற்கனவே நடைபெற்ற முதலாவது டி20 போட்டியில் இந்திய அணி நான்கு விக்கெட் வித்தியாசத்தில் அபார வெற்றி பெற்றுத் தொடரில் முன்னிலை வகிக்கிறது.

இந்தத் தொடரில் இந்திய தொடக்க வீராங்கனைகளான ஸ்மிருதி மந்தனா மற்றும் ஷபாலி வர்மா இருவரும் முக்கிய சர்வதேச சாதனைகளை எட்டும் விளிம்பில் உள்ளனர். இந்திய அணியின் முன்னணி தொடக்க வீராங்கனையான ஸ்மிருதி மந்தனா, சர்வதேச டி20 போட்டிகளில் இதுவரை 4,876 ரன்கள் குவித்துள்ளார். சர்வதேச டி20 கிரிக்கெட்டில் 5,000 ரன்கள் என்ற வரலாற்று மைல்கல்லை எட்டுவதற்கு அவருக்கு இன்னும் 124 ரன்கள் மட்டுமே தேவையாக உள்ளது.

அதேபோல் மற்றொரு தொடக்க வீராங்கனையான ஷபாலி வர்மா, நடப்பு 2026ஆம் ஆண்டில் மட்டும் இதுவரை 867 ரன்கள் விளாசியுள்ளார். ஒரே சர்வதேச காலண்டர் ஆண்டில் 1,000 ரன்களைக் கடக்கும் சாதனையைப் படைக்க அவருக்கு மேலும் 133 ரன்கள் தேவைப்படுகிறது. 

இவ்விரு வீராங்கனைகளும் வரவிருக்கும் போட்டிகளில் இந்த இலக்குகளை அடையும் பட்சத்தில் மகளிர் சர்வதேச டி20 கிரிக்கெட் வரலாற்றில் புதிய உலக சாதனைகளைப் படைப்பார்கள் என்று எதிர்பார்க்கப்படுகிறது.