₹40 கோடி வரை ஊழல்... கோவை மாநகராட்சி கூட்டத்தில் திமுக – காங்கிரஸ் கவுன்சிலர்கள் இடையே பயங்கர மோதல்!

கோவை மாநகராட்சிக் கூட்டத்தில் செம்மொழிப் பூங்கா திட்டத்தில் பெரும் ஊழல் நடந்துள்ளதாகக் காங்கிரஸ் பெண் கவுன்சிலர் குற்றம் சாட்டியதைத் தொடர்ந்து, ஆளுங்கட்சியான திமுக மற்றும் அதன் கூட்டணிக் கட்சியான காங்கிரஸ் கவுன்சிலர்களுக்கு இடையே மாமன்ற வளாகத்திலேயே பயங்கர மோதல் வெடித்த சம்பவம் பெரும் பரபரப்பை ஏற்படுத்தியுள்ளது.

கோவை மாநகராட்சியின் மாமன்றக் கூட்டம் நடைபெற்றது. கூட்டத்தின் போது, கோவையில் அமைக்கப்பட்டு வரும் செம்மொழிப் பூங்கா திட்டப் பணிகள் குறித்து விவாதம் எழுந்தது. அப்போது எழுந்து பேசிய காங்கிரஸ் கட்சியின் பெண் கவுன்சிலர் ஒருவர், இந்தச் செம்மொழிப் பூங்கா அமைக்கும் திட்டத்தில் சுமார் ₹40 கோடி வரை ஊழல் முறைகேடுகள் நடந்துள்ளதாகப் பகிரங்கமாகக் குற்றம் சாட்டி, அதற்கு எதிரான முழக்கங்களை எழுப்பினார். இதனால் அதிர்ச்சியடைந்த திமுக கவுன்சிலர்கள், அவரது புகாருக்குக் கடுமையான எதிர்ப்பைத் தெரிவித்தனர்.

இருதரப்புக்கும் இடையே ஏற்பட்ட சாதாரணத் தர்க்கம், அடுத்த சில நிமிடங்களிலேயே கட்டுக்கடங்காத வாக்குவாதமாக மாறியது. ஊழல் புகாரைத் திரும்பப் பெறக் கோரி திமுக கவுன்சிலர்கள் முழக்கமிட்ட நிலையில், காங்கிரஸ் கவுன்சிலர்களும் அவர்களுக்கு இணையாக அவையின் மையப் பகுதிக்கு வந்து காரசார விவாதத்தில் ஈடுபட்டனர்.

இந்த அமளிக்கு இடையே, ஊழல் புகாரை ஆதாரங்களுடன் சுட்டிக்காட்டி முழக்கமிட்டுக் கொண்டிருந்த அந்த காங்கிரஸ் பெண் கவுன்சிலரை, திமுக கவுன்சிலர்கள் சிலர் ஆவேசமாகப் பிடித்துக் கீழே தள்ளிவிட்டதாகக் கூறப்படுகிறது.

கூட்டணிக் கட்சிகளுக்குள் அவையிலேயே ஏற்பட்ட இந்த நேரடி மோதல் மற்றும் பெண் கவுன்சிலர் மீதான தாக்குதல் புகாரைத் தொடர்ந்து, மாமன்ற வளாகமே போர்க்களம் போலக் காட்சியளித்தது. இருதரப்பு எம்பிக்கள் மற்றும் தலைவர்களின் டெல்லி பனிப்போர் தற்போது உள்ளாட்சி அமைப்புகளிலும் எதிரொலிக்கத் தொடங்கியுள்ளதாக அரசியல் விமர்சகர்கள் கருதுகின்றனர்.

திமுக மற்றும் காங்கிரஸ் கவுன்சிலர்கள் தங்களுக்குள் ஒருவரையொருவர் சாடிக் கொண்டு மாமன்ற வளாகத்தில் திரண்டதால் ஏற்பட்ட பதற்றத்தைத் தணிக்க, மாநகராட்சி அதிகாரிகள் மற்றும் போலீஸார் தற்பொழுது பேச்சுவார்த்தையில் ஈடுபட்டு வருகின்றனர்.