குதிரை பேர வழக்கை சிபிஐக்கு மாற்றக்கோரிய மனுவின் தீர்ப்பு ஒத்திவைப்பு!

தமிழக வெற்றிக் கழக  ஆட்சியைக் கவிழ்க்கும் நோக்கில் ஊத்தங்கரை சட்டமன்ற உறுப்பினரிடம் குதிரை பேரம் பேசப்பட்டதாக எழுந்த புகார் மீதான வழக்கு, சென்னை உயர் நீதிமன்றத்தில் இன்று முக்கியக் கட்டத்தை எட்டியுள்ளது. இவ்வழக்கின் விசாரணையை மத்திய புலனாய்வு அமைப்பான சிபிஐக்கு மாற்றக் கோரி தாக்கல் செய்யப்பட்ட மனுவின் தீர்ப்பை நீதிமன்றம் ஒத்திவைத்துள்ளது.

இவ்வழக்கைச் சிபிஐ விசாரணைக்கு மாற்றக் கோரி வழக்கறிஞர் பாலசுப்பிரமணியன் என்பவர் சென்னை உயர் நீதிமன்றத்தில் பொதுநல மனு ஒன்றைத் தாக்கல் செய்திருந்தார். இந்த மனு இன்று நீதிமன்றத்தில் விசாரணைக்கு வந்தபோது, வழக்கை விசாரித்த நீதிபதிகள் அமர்வு மனுதாரர் தரப்பிடம் பல்வேறு அடுக்கடுக்கான கேள்விகளை எழுப்பியது.

"மாநில காவல் துறையின் தற்போதைய விசாரணையில் என்ன குறைபாடு உள்ளது? இந்த வழக்கினை ஏன் உடனடியாக சிபிஐக்கு மாற்ற வேண்டும்?" என நீதிபதிகள் கேள்வி எழுப்பினர். இதனைத் தொடர்ந்து, மனுதாரர் தரப்பிலும், அரசு மற்றும் காவல்துறை தரப்பிலும் அடுக்கடுக்கான வாதங்கள் முன்வைக்கப்பட்டன. இருதரப்பு வாதங்களையும் முழுமையாகக் கேட்டறிந்த சென்னை உயர் நீதிமன்ற நீதிபதிகள், இந்த மனு மீதான இறுதித் தீர்ப்பைத் தேதி குறிப்பிடாமல் ஒத்திவைத்து அதிரடி உத்தரவிட்டனர்.

த.வெ.க. அரசு பொறுப்பேற்ற பின் எழுந்துள்ள இந்த அரசியல் விவகாரத்தில் உயர் நீதிமன்றத்தின் தீர்ப்பு எவ்வாறு அமையப்போகிறது என்பது அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது.