க்யூட் வீடியோ... ராணுவ வீரரின் குழந்தையைக் கொஞ்சிய முதல்வர் விஜய்... ₹48 லட்சம் நிதியுதவி!

 By Seetha Jun 15, 2026, 15:35 IST
ராணுவ விஜய் ராணுவ விஜய்

ஜம்மு காஷ்மீரில் பயங்கரவாதிகளுக்கு எதிரான போரில் வீரத்துடன் சண்டையிட்டுப் காயமடைந்த தமிழகத்தைச் சேர்ந்த ராணுவ வீரரைத் தலைமைச் செயலகத்திற்கு வரவழைத்துப் பாராட்டிய முதலமைச்சர் விஜய், அவரது குழந்தையைக் கையில் ஏந்தி கொஞ்சி மகிழ்ந்துள்ளார்.

தேனி மாவட்டத்தைச் சேர்ந்த ராணுவ வீரர் லான்ஸ் நாயக் மீனாட்சி சுந்தரம், கடந்த 2024-ஆம் ஆண்டு டிசம்பர் 19-ஆம் தேதி அன்று ஜம்மு காஷ்மீர் மாநிலத்தின் குல்காம் பகுதியில் நடைபெற்ற பயங்கரவாதிகளுக்கு எதிரான துப்பாக்கிச் சண்டையில் ஈடுபட்டிருந்தார். இந்தத் தாக்குதலின் போது அவரது தோள் மற்றும் முகம் உள்ளிட்ட பல இடங்களில் பலத்த காயங்கள் ஏற்பட்டன.

ஆனாலும், தனது கடுமையான காயங்களையும் பொருட்படுத்தாமல் நாட்டின் பாதுகாப்பிற்காகத் தொடர்ந்து போரிட்ட அவர், பயங்கரவாதிகளை வீழ்த்தி சாதனை படைத்தார். அவரது இந்த அசாத்திய துணிச்சலையும், தியாகத்தையும் பாராட்டி இந்திய ராணுவம் அவருக்கு உயரிய 'கீர்த்தி சக்ரா' விருதை வழங்கி கௌரவித்தது.


இதனைத் தொடர்ந்து, வீரத்தாயகமான தமிழகத்தைச் சேர்ந்த ராணுவ வீரர் மீனாட்சி சுந்தரத்தின் வீரத்தைப் போற்றும் வகையில், அவரைச் சென்னை தலைமைச் செயலகத்திற்கு முதலமைச்சர் விஜய் நேரில் வரவழைத்தார். இந்தச் சந்திப்பின் போது, தமிழக அரசின் சார்பில் ராணுவ வீரர் மீனாட்சி சுந்தரத்திற்கு 48 லட்சம் ரூபாய்க்கான நிதியுதவிக் காசோலையை வழங்கி முதலமைச்சர் வாழ்த்துகளையும், பாராட்டுகளையும் தெரிவித்தார்.

இந்த நெகிழ்ச்சியான சந்திப்பின் போது, ராணுவ வீரர் மீனாட்சி சுந்தரத்துடன் வந்திருந்த அவரது குழந்தையைத் முதலமைச்சர் விஜய் மிகுந்த அன்போடு தனது கைகளில் வாங்கினார். பின்னர், அந்தக் குழந்தையைத் தனது மடியில் அமர வைத்துப் புன்னகையோடு கொஞ்சி மகிழ்ந்தார்.

ராணுவ வீரரின் தியாகத்தை மதிப்பதோடு மட்டுமல்லாமல், அவரது குடும்பத்தினரிடமும் மிகுந்த எளிய முறையில் அன்பைச் செலுத்திய முதலமைச்சர் விஜய்யின் இந்த புகைப்படங்கள் சமூக வலைத்தளங்களில் வைரலாகி வருகின்றன. ராணுவ வீரருக்கு உரியக் கௌரவம் அளித்த முதலமைச்சரின் இந்தச் செயலுக்குப் பொதுமக்கள் மற்றும் சமூக ஆர்வலர்கள் மத்தியிலும் பாராட்டுகள் குவிந்து வருகின்றன.