எம்.எல்.ஏ பதவியை ராஜினாமா செய்கிறார் சி.வி.சண்முகம்.. காலியாகும் அதிமுக கூடாரம்!

அதிமுகவின் மூத்த தலைவர்களில் ஒருவரும், முன்னாள் அமைச்சருமான சி.வி.சண்முகம் தனது சட்டமன்ற உறுப்பினர் பதவியை ராஜினாமா செய்துவிட்டு, ஆளுங்கட்சியான தமிழக வெற்றிக் கழகத்தில் இணையப் போவதாக எழுந்துள்ள புதிய அரசியல் தகவல்கள் தமிழக அரசியல் களத்தில் பெரும் விவாதத்தைக் கிளப்பியுள்ளன.

மயிலம் தொகுதி சட்டமன்ற உறுப்பினராக இருக்கும் சி.வி.சண்முகம், கடந்த சில வாரங்களாகவே அதிமுக தலைமை மீது கடும் அதிருப்தியில் இருந்து வந்ததாகக் கூறப்படுகிறது.

அண்மையில் அதிமுக பொதுச்செயலாளர் எடப்பாடி கே. பழனிசாமி அவசரமாகக் கூட்டிய உள்கட்சி கூட்டத்தில், எஸ்.பி.வேலுமணி உள்ளிட்ட அக்கட்சியின் முக்கிய சட்டமன்ற உறுப்பினர்கள் மற்றும் மூத்த நிர்வாகிகள் நேரில் சென்று அவரிடம் உள்கட்சி விவகாரங்கள் தொடர்பாகத் தங்களது விளக்கத்தை அளித்துச் சமரசம் செய்து கொண்டனர்.

ஆனால், எஸ்.பி.வேலுமணி உள்ளிட்ட மூத்த நிர்வாகிகள் சென்றபோது, சி.வி.சண்முகம் அவர்களுடன் செல்லாமல் தன்னிச்சையாக அந்தச் சந்திப்பைத் தவிர்த்தார். தொடர்ந்து கட்சியின் தற்போதைய தலைமைச் செயல்பாடுகள் மற்றும் தேர்தல் உத்திகள் குறித்து அவர் கடுமையான அதிருப்தியைத் தனது ஆதரவாளர்களிடம் வெளிப்படுத்தி வந்ததாகத் தெரிகிறது.

அதிமுக தலைமையுடனான இந்தத் தொடர் கருத்து வேறுபாடுகளின் உச்சக்கட்டமாக, சி.வி.சண்முகம் தங்களது அரசியல் பாதையை மாற்றத் தீர்மானித்துள்ளதாக அரசியல் உள்வட்டாரத் தகவல்கள் தெரிவிக்கின்றன. கட்சித் தாவல் தடைச் சட்டத்தின் கீழ் சிக்காமல் இருக்க, தற்பொழுது தான் வகித்து வரும் மயிலம் தொகுதி சட்டமன்ற உறுப்பினர் பதவியை முறைப்படி சபாநாயகரிடம் ராஜினாமா செய்ய அவர் முடிவெடுத்துள்ளதாகக் கூறப்படுகிறது.

பதவியை ராஜினாமா செய்த பின்னர், முதலமைச்சர் விஜய் முன்னிலையில் தவெக-வில் அவர் அதிகாரப்பூர்வமாக இணைய உள்ளதாகத் தகவல்கள் பரவி வருகின்றன. வடதமிழகத்தில் குறிப்பாக விழுப்புரம் மற்றும் கடலூர் மாவட்டங்களில் வலுவான அடித்தளம் கொண்ட சி.வி.சண்முகம் தவெக-விற்கு வந்தால், அது தங்களுக்குப் பெரும் பலமாக அமையும் எனத் தவெக தரப்பு கருதுவதாகவும் பேசப்படுகிறது.

இருப்பினும், இந்த விவகாரம் குறித்து அதிமுகவின் அதிகாரப்பூர்வத் தரப்பிலிருந்தோ அல்லது சி.வி.சண்முகத்தின் அலுவலகத் தரப்பிலிருந்தோ இதுவரை எந்தவிதமான நேரடி மறுப்போ அல்லது அதிகாரப்பூர்வ அறிவிப்போ வெளியிடப்படவில்லை.

தமிழ்நாட்டில் ஆட்சி மாற்றத்திற்குப் பின் அதிமுகவின் முக்கிய விக்கெட்டுகள் சரிந்து வருவதாகப் பேசப்படும் நிலையில், சி.வி.சண்முகம் தவெக-விற்குச் செல்லப் போகிறார் என்ற இந்தச் செய்தி ஒட்டுமொத்தத் தமிழக அரசியல் வட்டாரத்திலும், குறிப்பாக விக்கிரவாண்டி மற்றும் விழுப்புரம் மாவட்டப் பகுதி அரசியல் பிரமுகர்கள் மத்தியிலும் தற்பொழுது பெரும் புயலைக் கிளப்பியுள்ளது.