நாகப்பட்டினம், கடலூர் துறைமுகங்களில் 1 ம் எண் புயல் எச்சரிக்கை கூண்டு ஏற்றம்!

மத்திய மேற்கு மற்றும் வடமேற்கு வங்கக்கடல் பகுதிகளில் நிலவி வந்த காற்றழுத்தத் தாழ்வுப் பகுதியானது, மேலும் தீவிரமடைந்து வலுவான தாழ்வு மண்டலமாக மாறியுள்ளதாக சென்னை மண்டல வானிலை ஆய்வு மையம் தெரிவித்துள்ளது. இதன் காரணமாகக் கடல் பகுதிகளில் வழக்கத்தை விடக் கடுமையான சீற்றமும், மணிக்கு 45 கிலோமீட்டர் முதல் 65 கிலோமீட்டர் வரை பலத்த சூறாவளிக் காற்றும் வீசக்கூடும் என எச்சரிக்கப்பட்டுள்ளது. இந்த திடீர் வானிலை மாற்றத்தின் காரணமாகத் துறைமுகங்களுக்கு வரும் கப்பல்களுக்கு முதற்கட்ட எச்சரிக்கை விடுக்கும் பணிகள் தொடங்கப்பட்டுள்ளன.

இந்தத் தீவிர வானிலை எச்சரிக்கையைத் தொடர்ந்து, தமிழகத்தின் முக்கியக் கடலோர மாவட்டங்களான நாகப்பட்டினம் மற்றும் கடலூர் துறைமுகங்களில் 1 ஆம் எண் புயல் எச்சரிக்கைக் கூண்டு முறைப்படி ஏற்றப்பட்டுள்ளது. கடல் பகுதியில் தூரத்தில் புயல் உருவாவதற்கான சாதகமான சூழல் நிலவுவதை உணர்த்தவே இந்த கூண்டு ஏற்றப்பட்டுள்ளதாக அதிகாரிகள் விளக்கியுள்ளனர். இந்த எச்சரிக்கை காரணமாகக் கடலோரப் பகுதிகளில் கடல் அலைகள் சீற்றத்துடன் காணப்படுவதால் பொதுமக்களும், சுற்றுலாப் பயணிகளும் கடலுக்கு அருகில் செல்வதைத் தவிர்க்குமாறு அறிவுறுத்தப்பட்டுள்ளனர்.

மீனவர்களின் பாதுகாப்பைக் கருத்தில் கொண்டு, விசைப்படகுகள் மற்றும் நாட்டுப்படகுகள் வைத்திருப்பவர்கள் யாரும் மறுஅறிவிப்பு வரும் வரை ஆழ்கடல் பகுதிகளுக்கு மீன்பிடிக்கச் செல்ல வேண்டாம் என மீன்வளத்துறை சார்பில் கடுமையான உத்தரவு பிறப்பிக்கப்பட்டுள்ளது. மேலும் கடலோரப் பகுதி மாவட்ட நிர்வாகங்கள் அனைத்தும் முன்னெச்சரிக்கை நடவடிக்கைகளைத் தீவிரப்படுத்தியுள்ளன. அவசரக்கால மீட்புக் குழுவினர் மற்றும் கடலோரக் காவல் படையினர் அனைவரும் எவ்வித பாதிப்புகளையும் எதிர்கொள்ளும் வகையில் தயார் நிலையில் இருக்கும்படி வேண்டுகோள் விடுக்கப்பட்டுள்ளது.