சிலிண்டர் வெடித்து தரைமட்டமான வீடு; 10 வயது சிறுவன் உயிரிழப்பு!

விழுப்புரம் மாவட்டம் அரகண்டநல்லூர் அருகே சமையலறையில் எரிவாயு சிலிண்டர் பயங்கர சத்தத்துடன் வெடித்துச் சிதறியதில், வீட்டின் மேற்கூரை இடிந்து தரைமட்டமான கோர விபத்தில் 10 வயது சிறுவன் சம்பவ இடத்திலேயே பரிதாபமாக உயிரிழந்தான்.

விழுப்புரம் மாவட்டம் அரகண்டநல்லூர் அடுத்த வீரசோழபுரம் பகுதியைச் சேர்ந்தவர் மூர்த்தி. இவரது மனைவி சரண்யா. இந்தத் தம்பதியினருக்கு பத்ரிநாத் (10) என்ற 10 வயது மகன் இருந்தான். இன்று காலை வழக்கம்போல் சரண்யா தனது வீட்டின் சமையலறையில் சமையல் செய்து கொண்டிருந்தபோது, எதிர்பாராதவிதமாகச் சமையல் எரிவாயு சிலிண்டர் பயங்கர சத்தத்துடன் வெடித்துச் சிதறியது.

சிலிண்டர் வெடித்ததன் தாக்கம் மிகக் கொடூரமாக இருந்ததால், வீட்டின் சுவர்கள் மற்றும் மேற்கூரை கட்டமைப்பு ஆகியவை அடுத்த நொடியே பலத்த சத்தத்துடன் இடிந்து தரைமட்டமாகின. இந்தக் கோர விபத்தில் இடிபாடுகளுக்குள் சிக்கிய 10 வயதுச் சிறுவன் பத்ரிநாத் சம்பவ இடத்திலேயே பரிதாபமாக உயிரிழந்தான். அவனது பெற்றோர் மூர்த்தி மற்றும் சரண்யா ஆகிய இருவரும் பலத்த காயமடைந்தனர்.

சிலிண்டர் வெடித்த அதிர்ச்சி சத்தம் கேட்டு ஓடிவந்த அக்கம் பக்கத்தினர், இடிபாடுகளுக்குள் உயிருக்குப் போராடிக்கொண்டிருந்த மூர்த்தி மற்றும் சரண்யாவை மீட்டு உடனடியாக மருத்துவமனைக்கு அனுப்பி வைத்தனர். தகவலறிந்து சம்பவ இடத்திற்கு விரைந்து வந்த காவல்துறையினர் மற்றும் தீயணைப்புப் படையினர், ஜே.சி.பி இயந்திரத்தின் உதவியுடன் இடிபாடுகளை அகற்றிச் சிறுவனின் உடலை மீட்டனர்.

இச்சம்பவம் குறித்து அரகண்டநல்லூர் போலீசார் வழக்குப் பதிவு செய்து, சிலிண்டர் கசிவு காரணமாக விபத்து நேரிட்டதா என்ற கோணத்தில் தீவிர விசாரணை நடத்தி வருகின்றனர். தீபாவளிப் பண்டிகை நேரத்தில் நிகழ்ந்த இந்தச் சோகச் சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.