மேற்காசியாவில் விடியல்? ஈரான் - அமெரிக்கா இடையே 60 நாட்கள் போர் நிறுத்த நீட்டிப்பு ஒப்பந்தம்!

வளைகுடா பிராந்தியத்தில் கடந்த மூன்று மாதங்களாக நீடித்து வந்த கடுமையான போர் பதற்றத்தைத் தணிக்கும் வகையில், அமெரிக்கா மற்றும் ஈரான் நாடுகளுக்கு இடையே போர் நிறுத்தத்தை மேலும் 60 நாட்களுக்கு நீட்டிப்பதற்கான ஒரு தற்காலிக புரிந்துணர்வு ஒப்பந்தம் எட்டப்பட்டுள்ளது.

கடந்த பிப்ரவரி 28-ஆம் தேதி ஈரான் மீது அமெரிக்கா - இஸ்ரேல் படைகள் நடத்திய கூட்டுத் தாக்குதலைத் தொடர்ந்து, அதற்குப் பதிலடியாக ஈரான் அமெரிக்க ராணுவ தளங்கள் மற்றும் இஸ்ரேல் மீது ஏவுகணைத் தாக்குதல்களை நடத்தியது. இதனால் மேற்காசியாவில் முழு அளவிலான போர் மூண்டது.

உலக நாடுகளின் கவலையைத் தொடர்ந்து, கடந்த ஏப்ரல் 9-ஆம் தேதி முதற்கட்டமாக ஒரு குறுகிய கால தற்காலிக போர் நிறுத்தம் அறிவிக்கப்பட்டது. தற்போது பிராந்தியத்தில் நிரந்தர அமைதியைக் கொண்டு வரும் நோக்கில், இந்த போர் நிறுத்தத்தை மேலும் 60 நாட்களுக்கு நீட்டிக்க இரு தரப்பு அதிகாரிகளும் ஒப்புக்கொண்டு அதற்கான வரைவு ஒப்பந்தத்தைத் தயாரித்துள்ளனர்.

சர்வதேச ஊடகங்கள் மற்றும் அதிகாரிகள் தரப்பில் கசிந்துள்ள தகவல்களின்படி, இந்த 60 நாட்கள் தற்காலிக ஒப்பந்தத்தில் சில முக்கியமான நிபந்தனைகள் சேர்க்கப்பட்டுள்ளன. உலகளாவிய கச்சா எண்ணெய் போக்குவரத்திற்கு மிக முக்கியமான பாதையான ஹார்முஸ் ஜலசந்தியை ஈரான் உடனடியாகத் திறந்துவிட வேண்டும். மேலும், அங்கு கடந்த சில வாரங்களாக வைக்கப்பட்டிருந்த கடல் மைன்களை அடுத்த 30 நாட்களுக்குள் ஈரான் அகற்ற வேண்டும்.

வர்த்தகக் கப்பல்கள் எந்தவிதக் கட்டுப்பாடும் அல்லது கூடுதல் வரியும் இன்றி இந்த ஜலசந்தி வழியாகச் செல்ல அனுமதிக்கப்படும். அதற்குப் பிரதிபலனாக, ஈரான் துறைமுகங்கள் மீது அமெரிக்கா விதித்துள்ள கடற்படை முற்றுகையைத் தளர்த்திக் கொள்ளும். இந்த 60 நாட்கள் அவகாசத்தில், ஈரான் தனது அணு ஆயுதத் தயாரிப்பு முயற்சிகளைக் கைவிடுவது குறித்தும், யுரேனியம் செறிவூட்டலை நிறுத்துவது குறித்தும் இரு நாடுகளும் விரிவான பேச்சுவார்த்தையைத் தொடங்கும்.

அமெரிக்கா மற்றும் ஈரானிய தூதரக அதிகாரிகள் இந்த ஒப்பந்தத்தின் பெரும்பாலான விதிகளுக்குத் தங்களது சம்மதத்தைத் தெரிவித்துவிட்டனர். ஈரானின் உயர்மட்டத் தலைவர்களும் இதற்குப் பச்சைக்கொடி காட்டிவிட்டதாகத் தெரிகிறது. இருப்பினும், இந்த ஒப்பந்தம் அதிகாரப்பூர்வமாக நடைமுறைக்கு வர அமெரிக்க அதிபர் டொனால்ட் ட்ரம்பின் இறுதி ஒப்புதல் இன்னும் தேவைப்படுகிறது. இதுகுறித்து ட்ரம்ப் தரப்பு, "ஒப்பந்தத்தின் விதிகளை ஆய்வு செய்து முடிவெடுக்க இன்னும் ஓரிரு நாட்கள் அவகாசம் தேவை" எனக் கூறியுள்ளது.

சமீபத்தில் குவைத்தில் உள்ள அமெரிக்க ராணுவ தளத்தின் மீது நடத்தப்பட்ட ஏவுகணைத் தாக்குதல்களால் இந்த அமைதிப் பேச்சுவார்த்தை முறியும் அபாயம் ஏற்பட்ட சூழலில், தற்பொழுது எட்டப்பட்டுள்ள இந்த 60 நாட்கள் போர் நிறுத்த நீட்டிப்பு ஒப்பந்தம் உலக நாடுகள் மற்றும் சர்வதேச எண்ணெய் சந்தை மத்தியில் பெரும் நிம்மதியை ஏற்படுத்தியுள்ளது.