இலங்கை நீர்கொழும்பு சிறையில் பயங்கர மோதல்... போதைப்பொருள் கும்பல்களுக்கிடையேயான வன்முறையில் 25 கைதிகள் பலி!

இலங்கையின் மேற்கு மாகாணத்தில் உள்ள நீர்கொழும்பு சிறைச்சாலையில் கைதிகளுக்கு இடையே ஏற்பட்ட பயங்கர மோதலில் 25 கைதிகள் உயிரிழந்துள்ளனர். போதைப்பொருள் கடத்தல் குழுக்களுக்கு இடையே நிலவிய நீண்டகாலப் பகை காரணமாக இந்த வன்முறை வெடித்ததாகத் முதற்கட்டத் தகவல்கள் தெரிவிக்கின்றன.

நேற்று  நள்ளிரவு சிறை வளாகத்திற்குள் கைதிகள் இரு பிரிவாகப் பிரிந்து பயங்கர ஆயுதங்களுடன் மோதிக் கொண்டனர். சிறைக்குள் போதைப்பொருள் வர்த்தகத்தைக் கட்டுப்படுத்தும் ஒரு குழுவிற்கும், அதற்குப் பலத்த எதிர்ப்புத் தெரிவித்து வந்த மற்றொரு குழுவிற்கும் இடையே இந்த மோதல் திடீரென வன்முறையாக மாறியுள்ளது.

இந்தத் திடீர் தடியடி மற்றும் ஆயுத மோதலில் சம்பவ இடத்திலேயே 25 கைதிகள் பரிதாபமாக உயிரிழந்தனர். சிறைக்கலவரத்தில் படுகாயமடைந்த மேலும் 30 கைதிகள் உடனடியாக மீட்கப்பட்டு பலத்த பாதுகாப்புடன் நீர்கொழும்பு பொது மருத்துவமனையில் அனுமதிக்கப்பட்டுள்ளனர். சிகிச்சை பெற்று வருபவர்களில் 10 பேரின் நிலைமை மிகவும் கவலைக்கிடமாக உள்ளதாக மருத்துவமனை வட்டாரங்களும், சிறைத்துறை அதிகாரிகளும் தெரிவித்துள்ளனர். இதனால் பலி எண்ணிக்கை மேலும் உயரக்கூடும் என அஞ்சப்படுகிறது.

இந்தத் துயரச் சம்பவத்தைத் தொடர்ந்து, எல்லையைத் தாண்டி மீன்பிடித்ததாகக் கூறி இலங்கை கடற்படையினரால் கைது செய்யப்பட்டு, இந்த நீர்கொழும்பு சிறையில் அடைக்கப்பட்டுள்ள தமிழக மீனவர்களின் பாதுகாப்பு குறித்த பெரும் கேள்வி எழுந்துள்ளது. வன்முறை வெடித்த அதே சிறை வளாகத்தில் தமிழகத்தைச் சேர்ந்த மீனவர்களும் கைதிகளாக உள்ளதால், அவர்களின் தற்போதைய பாதுகாப்பு நிலை என்ன என்பது குறித்துத் தமிழகத்தில் உள்ள அவர்களது குடும்பத்தினரிடமும், மீனவ அமைப்புகளிடமும் பெரும் அச்சமும் கவலையும் ஏற்பட்டுள்ளது.

இந்தச் சிறைக் கலவரத்தை அடக்க அதிரடிப்படையினர் வரவழைக்கப்பட்டு, தற்போது சிறை வளாகம் முழுவதும் ராணுவக் கட்டுப்பாட்டுக்குள் கொண்டு வரப்பட்டுள்ளது. இச்சம்பவம் குறித்து இலங்கைச் சிறைத்துறை உயர் அதிகாரிகள் தீவிர விசாரணை மேற்கொண்டு வருகின்றனர்.