ரூ.41 கோடி கடன்... விஜயகாந்த் மகன் விஜயபிரபாகரன் சொத்து மதிப்பு எவ்வளவு?!

தமிழகத்தில் தேர்தல் திருவிழா களைக்கட்டியுள்ள நிலையில், வேட்புமனு தாக்கல் நேற்றுடன் நிறைவு பெற்றது. தேமுதிக நிறுவனத் தலைவர் மறைந்த விஜயகாந்தின் மகன் விஜயபிரபாகரன், இந்தச் சட்டமன்றத் தேர்தலில் தனது அரசியல் பயணத்தின் அடுத்த கட்டமாக வேட்புமனுத் தாக்கல் செய்துள்ளார். அவர் தாக்கல் செய்துள்ள பிரமாணப் பத்திரத்தில் தனது சொத்து மதிப்பு மற்றும் கடன் விபரங்களைத் தெரிவித்துள்ளார்.

அதில் விஜயபிரபாகரனிடம் மொத்தம் ரூ. 28.70 கோடி மதிப்பிலான சொத்துக்கள் இருப்பதாகத் தெரிவிக்கப்பட்டுள்ளது.  வங்கிக் கணக்கு இருப்பு, தங்கம், வாகனங்கள் மற்றும் முதலீடுகள் என மொத்தம் ரூ. 19.70 கோடி மதிப்பிலான அசையும் சொத்துக்கள் அவரிடம் உள்ளன. நிலம் மற்றும் கட்டிடங்கள் உள்ளிட்ட அசையா சொத்துக்களின் மதிப்பு ரூ. 9 கோடி எனத் தெரிவிக்கப்பட்டுள்ளது.

சொத்துக்களை விட அவருக்குக் கடன் அதிகமாக இருப்பது பிரமாணப் பத்திரத்தில் தெரியவந்துள்ளது. பல்வேறு வங்கிகள் மற்றும் தனிநபர்களிடம் இருந்து பெறப்பட்ட கடன்களின் மொத்த மதிப்பு ரூ. 41.51 கோடி என அவர் குறிப்பிட்டுள்ளார்.

கடந்த 2024 மக்களவைத் தேர்தலில் விருதுநகர் தொகுதியில் போட்டியிட்டு மிகக் குறைந்த வாக்குகள் வித்தியாசத்தில் வெற்றியைத் தவறவிட்ட விஜயபிரபாகரன், தற்போது சட்டமன்றத் தேர்தலில் களம் காண்கிறார். தனது தந்தையின் செல்வாக்கையும், இளைஞர்களின் ஆதரவையும் நம்பி அவர் இந்தப் போட்டியில் இறங்கியுள்ளார். வேட்புமனுத் தாக்கலின் போது ஏராளமான தேமுதிக தொண்டர்கள் திரண்டு வந்து அவருக்கு உற்சாக வரவேற்பு அளித்தனர்.