டெல்லியில் இன்று இரவு 9 மணி முதல் 57 மெட்ரோ நிலையங்கள் மூடல்!

டெல்லியில் நாளை (அக்டோபர் 10) நடைபெற உள்ள போராட்டத்தை முன்னிட்டு, இன்று இரவு 9 மணி முதல் 57 மெட்ரோ ரயில் நிலையங்களின் நுழைவு மற்றும் வெளியேறும் வாயில்களை மூடுவதாக டெல்லி மெட்ரோ ரயில் நிறுவனம் (DMRC) அறிவித்துள்ளது. பாதுகாப்பு காரணங்களுக்காக இந்த நடவடிக்கை எடுக்கப்பட்டுள்ளது.

வாக்காளர் பட்டியல் சிறப்பு தீவிர திருத்தம் (SIR) தொடர்பாக தலைமைத் தேர்தல் ஆணையர் ஞானேஷ் குமாருக்கு எதிராக, காக்ரோச் ஜனதா கட்சி (Cockroach Janata Party – CJP) உள்ளிட்ட அமைப்புகள் டெல்லி ஜந்தர் மந்தரில் நாளை போராட்டம் நடத்தத் திட்டமிட்டுள்ளன. இந்தப் போராட்டத்துக்கு டெல்லி காவல்துறை அனுமதி மறுத்துள்ளதாகத் தகவல்கள் தெரிவிக்கின்றன.போராட்டத்தின்போது அதிக அளவில் மக்கள் கூடக்கூடும் என்றும், முக்கியப் பகுதிகளில் பாதுகாப்புப் பிரச்சினைகள் ஏற்பட வாய்ப்புள்ளதாகவும் கருதப்படுவதால் மெட்ரோ நிலையங்களில் கட்டுப்பாடுகள் விதிக்கப்பட்டுள்ளன.

இதன்படி, அக்டோபர் 9-ஆம் தேதி இரவு 9 மணி முதல் அக்டோபர் 10-ஆம் தேதி நிலைமை சீராகும் வரை 57 நிலையங்களின் நுழைவு மற்றும் வெளியேறும் வாயில்கள் மூடப்பட்டிருக்கும். இருப்பினும், பாதிக்கப்பட்ட நிலையங்களில் ரயில் மாறிச் செல்லும் வசதி தொடரும். நியூ டெல்லி மெட்ரோ நிலையத்தில் மட்டும் இந்த வசதியும் கிடைக்காது என அறிவிக்கப்பட்டுள்ளது. சூழ்நிலையைப் பொறுத்து சில வழித்தடங்களில் ரயில் சேவை இடைவெளியும் மாற்றப்படலாம்.

இதற்கிடையே, போராட்டத்தையொட்டி டெல்லியில் சுமார் 23,000 காவல்துறை மற்றும் துணை ராணுவப் படையினர் பாதுகாப்புப் பணியில் ஈடுபடுத்தப்பட உள்ளதாகச் செய்திகள் தெரிவிக்கின்றன. நியூ டெல்லி மற்றும் ஹஸ்ரத் நிஜாமுதீன் ரயில் நிலையங்களுக்கான சில ரயில் சேவைகளும் ரத்து செய்யப்பட்டுள்ளதாகத் தகவல்கள் வெளியாகியுள்ளன.எனவே, டெல்லியில் இன்று இரவு மற்றும் நாளை மெட்ரோவில் பயணம் செய்யத் திட்டமிட்டுள்ளவர்கள், தங்களது வழித்தடத்தில் உள்ள நிலையங்களின் நிலையை முன்கூட்டியே சரிபார்த்துக்கொள்வது அவசியம். பயணத் திட்டத்தில் மாற்றம் தேவைப்படலாம் என்பதால், டெல்லி மெட்ரோவின் அதிகாரப்பூர்வ அறிவிப்புகளைப் பின்பற்றுமாறு பயணிகள் அறிவுறுத்தப்படுகிறார்கள்.