டெலிவரி ஊழியரை ஆபாசமாகத் திட்டிய விவகாரம்... நேரில் மன்னிப்பு கேட்டு வீடியோ வெளியிட்ட இளம்பெண்!

உணவு டெலிவரி செய்யும் ஊழியர் ஒருவரை இளம்பெண் ஒருவர் தகாத வார்த்தைகளால் திட்டி அவமதித்த சம்பவம் தொடர்பான வீடியோ இணையத்தில் பரவி பெரும் பரபரப்பை ஏற்படுத்தியது. சென்னை மணலி அருகே இளம்பெண் ஒருவர் உணவு ஆர்டர் செய்தபோது, கூகுள் வரைபடத்தில் முகவரி தவறாகக் காட்டப்பட்டதால் உணவைக் கொண்டு வருவதில் சற்று தாமதம் ஏற்பட்டுள்ளது. இதனால் ஆத்திரமடைந்த அப்பெண், உணவைக் கொண்டு வந்த கிஷோர் என்ற டெலிவரி ஊழியரிடம் கடும் வாக்குவாதத்தில் ஈடுபட்டு ஆபாசமான வார்த்தைகளால் வசைபாடியுள்ளார். இளைஞரின் குடும்பத்தைக் கூட இழவுபடுத்திப் பேசிய அந்த வீடியோ சமூக வலைதளங்களில் காட்டுத்தீ போல் பரவிப் பொதுமக்கள் மத்தியில் பெரும் எதிர்ப்பைக் கிளப்பியது.

கடுமையான விமர்சனங்கள் எழுந்ததைத் தொடர்ந்து, அந்த இளம்பெண் டெலிவரி ஊழியர் கிஷோரை நேரில் தேடிச் சென்று தனது தவறுக்காகப் பகிரங்கமாக மன்னிப்பு கேட்டுள்ளார். தான் நடந்துகொண்ட விதம் தவறானது என்றும், இதனால் மனவேதனை அடைந்த அனைத்து டெலிவரி ஊழியர்களிடமும் மனதார மன்னிப்பு கேட்பதாகவும் அவர் கூறியுள்ளார். மேலும் தங்களுக்குள் எழுந்த மனக்கசப்புகள் அனைத்தும் முடிவுக்கு வந்துவிட்டதாகவும், இனிமேல் தாங்கள் இருவரும் நல்ல நண்பர்கள் என்றும் கூறி அதற்கான வீடியோவையும் அவர் வெளியிட்டுள்ளார். அந்த வீடியோவில் "இனிமேல் சண்டை இல்லை, நாம பிரெண்ட்ஸ் சரியா?" எனக் கூறிப் பிரச்சனைக்கு முற்றுப்புள்ளி வைத்துள்ளார்.

தொழில்நுட்ப வளர்ச்சியால் அத்தியாவசியப் பொருட்கள் வீட்டின் வாசலுக்கே கிடைக்கும் நிலையில், இரவு பகலாக உழைக்கும் ஊழியர்களை மதிப்போடு நடத்த வேண்டும் என நெட்டிசன்கள் கருத்து தெரிவித்துள்ளனர். வாழ்வாதாரத்திற்காகக் கடும் வெயிலிலும் மழையிலும் வேலை செய்யும் டெலிவரி ஊழியர்களின் சிரமங்களைப் பொதுமக்கள் உணர்ந்து கொள்ள வேண்டும் என்றும் வலியுறுத்தப்பட்டு வருகிறது. தானாகவே நேரில் சென்று மன்னிப்பு கேட்டுப் பிரச்சனையைச் சுமுகமாக முடித்த அப்பெண்ணின் இந்த நடவடிக்கை இணையவாசிகளின் கவனத்தை ஈர்த்துள்ளது.