நெகிழ்ச்சி வீடியோ... போக்குவரத்து நெரிசல் மிகுந்த சாலையில் நடுரோட்டில் பெண்ணுக்கு பிரசவம்!
மகாராஷ்டிரா மாநிலம் புனேயில் மருத்துவமனைக்குச் சென்று கொண்டிருந்த கர்ப்பிணிப் பெண் ஒருவருக்கு எதிர்பாராத விதமாகச் சாலையிலேயே கடுமையான பிரசவ வலி ஏற்பட்டது. வலியால் அந்தப் பெண் துடித்ததைக் கண்ட அவ்வழியாகச் சென்ற பொதுமக்கள், ஒரு நொடியும் தாமதிக்காமல் மனிதாபிமானத்துடன் உதவிக்கு முன்வந்தனர். உடனடியாகத் தங்கள் வசம் இருந்த போர்வைகளைக் கொண்டு அந்தப் பெண்ணைச் சுற்றி ஒரு பாதுகாப்பு வளையத்தை உருவாக்கி அரணாக நின்றனர்.
மக்கள் அமைத்த அந்தப் பாதுகாப்பு வளையத்திற்குள்ளேயே, அங்கிருந்தவர்கள் உதவியுடன் அவசரமாக மருத்துவர் ஒருவர் வரவழைக்கப்பட்டார். மருத்துவமனைக்குச் செல்லக் கூட நேரமில்லாத இக்கட்டான சூழலில், மருத்துவரின் ஆலோசனையின்படி சாலையிலேயே அந்தப் பெண்ணுக்குப் பிரசவம் வெற்றிகரமாகப் பார்க்கப்பட்டது. பொதுமக்களின் சமயோசித புத்தியாலும், துரித நடவடிக்கையாலும் தாயும் சேயும் பாதுகாப்பாக மீட்கப்பட்டுப் பின்னர் மேலதிக சிகிச்சைக்காக மருத்துவமனைக்கு அனுப்பி வைக்கப்பட்டனர்.
பரபரப்பான நகர்ப்புறச் சூழலில் எந்திரகதியாக ஓடிக்கொண்டிருக்கும் மனிதர்களுக்கு மத்தியில், ஆபத்தான நேரத்தில் சாதி மதங்களைக் கடந்து ஒன்றிணைந்த மக்களின் இந்த நெகிழ்ச்சியான செயல் சமூக வலைதளங்களில் வைரலாகி வருகிறது. இக்கட்டான நிலையில் ஒரு பெண்ணின் கண்ணியத்தைப் பாதுகாத்து, உயிரைக் காப்பாற்றத் துணிச்சலுடன் செயல்பட்ட புனே மக்களின் மனிதநேயத்தைப் பலரும் பாராட்டி வருகின்றனர். இந்தச் சம்பவம் மனிதாபிமானம் இன்னும் உயிர்ப்புடன் இருப்பதை மீண்டும் ஒருமுறை நிரூபித்துள்ளது.