டெங்கு, உண்ணி காய்ச்சல் பாதிப்பு அதிகரிப்பு... மருத்துவமனைகளில் படுக்கைக்காக 12 மணி நேரம் காத்திருக்கும் அவலம்!

சென்னை உள்ளிட்ட பல்வேறு மாவட்டங்களில் காய்ச்சல் பாதிப்பு தீவிரமடைந்து வருவதால், மருத்துவமனைகளில் படுக்கை வசதி பெறுவதற்காக நோயாளிகள் 12 மணி நேரம் வரை காத்திருக்க வேண்டிய கட்டாயம் ஏற்பட்டுள்ளது.

சுவாசத் தொற்றுகள், இன்ஃப்ளுயன்சா, எச்1என்1 மற்றும் டெங்கு பாதிப்புகள் அதிகரித்து வருவதால், தனியார் மருத்துவமனைகளில் நோயாளிகளின் வருகை பெருமளவில் உயர்ந்துள்ளது. இதன் காரணமாக அவசர சிகிச்சைப் பிரிவில் அறை அல்லது படுக்கைக்காக 12 மணி நேரம் வரை காத்திருக்கும் சூழல் உருவாகியுள்ளது. மேலும், ஆர்எஸ்வி, அடினோ வைரஸ், ரைனோ வைரஸ் மற்றும் பாரா இன்ஃப்ளுயன்சா போன்ற பல்வேறு சுவாச வைரஸ் தொற்றுகளும் பரவி வருகின்றன.

பெரும்பாலானோர் உரிய மருந்து மற்றும் ஓய்வு மூலம் குணமடைந்தாலும், சிலருக்கு நெபுலைசேஷன் அல்லது நரம்புவழி திரவ சிகிச்சை தேவைப்படுவதாக மருத்துவர்கள் தெரிவிக்கின்றனர். முதியவர்கள் மற்றும் நீரிழிவு, உயர் இரத்த அழுத்தம், இதய நோய், சிறுநீரக நோய், புற்றுநோய் உள்ளிட்ட இணைநோய்கள் உள்ளவர்களுக்கு இந்தப் பாதிப்பு தீவிரமடையும் வாய்ப்பு அதிகம் உள்ளது. குழந்தைகள் மற்றும் இளம் வயதினரிடம் அதிக காய்ச்சல், கடுமையான சோர்வு, உணவு உட்கொள்ள முடியாமை மற்றும் சிலருக்குக் காய்ச்சல் காரணமாகக் குழப்பமான மனநிலை காணப்படுகிறது.

கடுமையான பாதிப்புகள் குறைவாகவே இருந்தாலும், குறிப்பாக முதியவர்கள் மற்றும் இணைநோய் உள்ளவர்கள் தாமதமாகச் சிகிச்சை பெறுவது உயிரிழப்புக்கு வழிவகுத்துவிடும் என்பதால், பொதுமக்கள் மிகுந்த எச்சரிக்கையுடன் இருக்க வேண்டும் என மருத்துவர்கள் அறிவுறுத்துகின்றனர்.