விமானங்களில் குறிப்பிட்ட பவர் பேங்க் எடுத்துச் செல்ல தடை! பயணிகளுக்கு புதிய கட்டுப்பாடுகள்
விமானத்தில் ஏற்பட்ட தீ விபத்தைத் தொடர்ந்து, குறிப்பிட்ட மாடல் பவர் பேங்கைக் கொண்டு செல்ல இந்திய விமானப் போக்குவரத்து ஒழுங்குமுறை ஆணையம் (DGCA) தடை விதித்துள்ளது. மேலும், விமானப் பயணத்தின்போது பவர் பேங்க் பயன்படுத்துவது தொடர்பாகவும் புதிய பாதுகாப்புக் கட்டுப்பாடுகள் அறிவிக்கப்பட்டுள்ளன.
நடுவானில் பவர் பேங்க் தீப்பற்றியதால் நடவடிக்கை
கடந்த அக்டோபர் 11-ம் தேதி, டெல்லியில் இருந்து சென்னை நோக்கி வந்த இண்டிகோ விமானத்தில், மேல்நிலைப் பெட்டியில் வைக்கப்பட்டிருந்த பவர் பேங்க் திடீரென தீப்பற்றி எரிந்தது. இதையடுத்து, பாதுகாப்பு காரணங்களுக்காக விமானம் ஐதராபாத்தில் அவசரமாகத் தரையிறக்கப்பட்டது.
இந்தச் சம்பவத்தைத் தொடர்ந்து, MOBIKINS MK-PB-04 என்ற குறிப்பிட்ட மாடல் பவர் பேங்கைக் கொண்டு செல்ல தடை விதிக்கப்பட்டுள்ளது. இந்தத் தடை இந்தியாவுக்குள் இயக்கப்படும் விமானங்கள் மட்டுமின்றி, இந்தியாவுக்கு வந்து செல்லும் விமானங்கள் மற்றும் சரக்கு விமானங்களுக்கும் பொருந்தும். இது அனைத்து பவர் பேங்க்களுக்குமான தடை அல்ல; குறிப்பிட்ட மாடலுக்கு மட்டுமே விதிக்கப்பட்டுள்ளது.
விமானப் பயணிகள் கவனிக்க வேண்டியவை
விமானம் பறந்து கொண்டிருக்கும்போது, பவர் பேங்க் மூலம் செல்போன், லேப்டாப் உள்ளிட்ட மின்னணு சாதனங்களை சார்ஜ் செய்யக் கூடாது என அறிவுறுத்தப்பட்டுள்ளது. அனுமதிக்கப்பட்ட பவர் பேங்க்களை மேல்நிலைப் பெட்டியில் வைக்காமல், பயணிகள் தங்களது கைப்பையில் வைத்திருக்க வேண்டும்.
எனவே, விமானத்தில் பயணம் செய்யத் திட்டமிடுபவர்கள் தங்களிடம் உள்ள பவர் பேங்கின் மாடலைச் சரிபார்த்துக்கொள்வது அவசியம். விமான நிறுவனங்கள் அறிவிக்கும் பாதுகாப்பு விதிமுறைகளையும் பயணிகள் கட்டாயம் பின்பற்ற வேண்டும்.