தனுஷ்கோடி டூ தலைமன்னார்.... 11 மணி நேரம் கடலில் நீந்தி பெங்களூரு தம்பதி சாதனை!

இலங்கையின் தலைமன்னார் முதல் இந்தியாவின் தனுஷ்கோடி வரையிலான கடல் பகுதியை 11 மணி நேரம் தொடர்ந்து நீந்திக் கடந்து பெங்களூருவைச் சேர்ந்த தம்பதி புதிய உலக சாதனை படைத்துள்ளனர். பெங்களூருவில் உள்ள மென்பொருள் நிறுவனம் ஒன்றில் பணியாற்றி வரும் டேனிசன் மற்றும் விருஷாலி தம்பதியினர், இன்று அதிகாலை 4.30 மணிக்கு இலங்கையின் தலைமன்னார் கடற்கரையிலிருந்து தங்களது வரலாற்றுச் சிறப்புமிக்க நீச்சல் பயணத்தைத் தொடங்கினர். சுமார் 28 கிலோமீட்டர் தூரமுள்ள இந்தக் கடல் பகுதியை இவர்கள் இருவரும் மன உறுதியுடன் கடந்து அசத்தியுள்ளனர்.

கடல் சீற்றம் மற்றும் பலத்த காற்று வீசிய போதிலும், சளைக்காமல் நீந்திய இந்தத் தம்பதி பிற்பகல் 3.15 மணியளவில் தனுஷ்கோடி அரிச்சல்முனைப் பகுதியை வந்தடைந்தனர். மொத்தம் 11 மணி நேரம் 15 நிமிடங்களில் இந்தப் பயணத்தை வெற்றிகரமாக முடித்ததன் மூலம், தலைமன்னார் - தனுஷ்கோடி இடையே நீந்திக் கடந்த முதல் தம்பதி என்ற பெருமையை இவர்கள் பெற்றுள்ளனர். இவர்களின் இந்தச் சாதனையைப் பாராட்டும் விதமாகத் தனுஷ்கோடி கடற்கரையில் குவிந்திருந்த பொதுமக்கள் மற்றும் சுற்றுலாப் பயணிகள் உற்சாகமாக வரவேற்றனர்.

நீரோட்டம் அதிகமாக இருந்ததால் திட்டமிட்டதை விட ஒரு மணி நேரம் தாமதமாகவே கரை சேர முடிந்ததாகச் சாதனை தம்பதியினர் தெரிவித்தனர். கடல் அலைகளின் சவால்களை முறியடித்துப் புதிய மைல்கல்லை எட்டியுள்ள இவர்களுக்குப் பல்வேறு தரப்பிலிருந்தும் வாழ்த்துகள் குவிந்து வருகின்றன. பெங்களூருவிலிருந்து ராமேஸ்வரம் வந்து முறையான பயிற்சிக்கு பின் இந்தச் சாதனையை நிகழ்த்தியுள்ளனர். இவர்களின் இந்த முயற்சி இளைஞர்களிடையே மிகப்பெரிய உத்வேகத்தை ஏற்படுத்தும் எனச் சமூக ஆர்வலர்கள் பாராட்டு தெரிவித்துள்ளனர்.