உலகம் முழுவதும் தீபாவளி பண்டிகை கோலாகலம்... புத்தாடை அணிந்து, பட்டாசுகள் வெடித்து கொண்டாடிய மக்கள்!

தீமையின் வடிவான நரகாசுரனை திருமால் வதம் செய்த நிகழ்வையும், வனவாசம் முடித்து அயோத்தி திரும்பிய ஸ்ரீராமரை மக்கள் தீபமேற்றி வரவேற்ற நாளையும் நினைவுகூரும் புனித நாளான தீபாவளித் திருநாளை உலகம் முழுவதும் உற்சாகமாக மக்கள் கொண்டாடினர்.

தமிழகம் உட்பட இந்தியாவின் அனைத்து மாநிலங்களிலும், மலேசியா, சிங்கப்பூர், இலங்கை, அமெரிக்கா, லண்டன் போன்ற உலக நாடுகளிலும் வாழும் தமிழ் மற்றும் இந்திய மக்கள் தீபாவளிப் பண்டிகையை விமரிசையாகக் கொண்டாடினர்.

அதிகாலையிலேயே பொதுமக்கள் நல்லெண்ணெய் தேய்த்து வெந்நீரில் நீராடி, புத்தாடைகளை உடுத்தி குடும்பத்தினருடன் இறைவனை வழிபட்டனர். வீடுகளில் விசேஷப் பலகாரங்கள் தயாரித்து, இறைவனுக்குப் படையலிட்டு, உறவினர்கள் மற்றும் நண்பர்களுடன் இனிப்புகளைப் பகிர்ந்து தங்களது மகிழ்ச்சியை வெளிப்படுத்தினர்.

நாடு முழுவதும் சிறியவர்கள் முதல் பெரியவர்கள் வரை அனைவரும் வான்வெடிகள் மற்றும் வண்ணப் பட்டாசுகளை வெடித்துத் தங்களது மகிழ்ச்சியை வெளிப்படுத்தினர்.

மாலையில் வீடுகள் தோறும் அகல் விளக்குகளை ஏற்றியும், வாசல்களில் வண்ணக்கோலங்கள் இட்டும் மக்கள் ஒளியின் பண்டிகையை வரவேற்றனர். புதிதாகத் திருமணமான இளம் தம்பதியினர், பெண் வீட்டில் உறவினர்களின் ஆசிகளோடு தங்களது முதலாவது 'தலை தீபாவளி'யைச் சிறப்பு விருந்துகளுடனும் பரிசுகளுடனும் மிக உற்சாகமாகக் கொண்டாடி மகிழ்ந்தனர்.