21 கட்சிகளுடன் 'மெகா' கூட்டணி - அசுர பலத்துடன் களம் காணும் திமுக!

2026 சட்டமன்றத் தேர்தலுக்கான களம் சூடுபிடித்துள்ள நிலையில், ஆளுங்கட்சியான திமுக தனது கூட்டணிக் கட்சிகளுடன் தொகுதிப் பங்கீட்டை வெற்றிகரமாக நிறைவு செய்துள்ளது. குறிப்பாக, நீண்ட நாட்களாக நீடித்து வந்த திமுக - காங்கிரஸ் இடையிலான இழுபறி நேற்று ஒரு முடிவுக்கு வந்துள்ளது.

தமிழக முதல்வர் மு.க. ஸ்டாலின் தலைமையிலான திமுக, வரும் தேர்தலைச் சந்திக்க இதுவரை இல்லாத அளவில் ஒரு மிகப்பெரிய கூட்டணியை உருவாக்கியுள்ளது.

கடந்த சில நாட்களாக 25 முதல் 30 தொகுதிகள் வரை காங்கிரஸ் கோரி வந்த நிலையில், இறுதியாக 28 சட்டமன்றத் தொகுதிகள் காங்கிரசுக்கு ஒதுக்கப்பட்டுள்ளன. சட்டமன்றத் தொகுதிகள் தவிர, கூடுதலாக 1 மாநிலங்களவை உறுப்பினர் இடத்தையும் காங்கிரசுக்கு வழங்க திமுக சம்மதித்துள்ளது. இதற்கான அதிகாரப்பூர்வ அறிவிப்பை திமுக தலைவர் மு.க. ஸ்டாலின் வெளியிட்டுள்ளார்.

திமுக தற்போது சிறிய மற்றும் பெரிய கட்சிகள் என மொத்தம் 21 கட்சிகளுடன் களம் இறங்குகிறது. காங்கிரஸ், விசிக, சிபிஐ, சிபிஎம், மதிமுக ஆகிய பழைய கூட்டணிக் கட்சிகளுடன், தற்போது விஜயகாந்தின் தேமுதிக மற்றும் கமல்ஹாசனின் மக்கள் நீதி மய்யம் ஆகிய கட்சிகளும் இணைந்துள்ளன. பல்வேறு சமூக மற்றும் பிராந்திய அமைப்புகளைச் சார்ந்த சிறிய கட்சிகளும் திமுகவின் 'உதயசூரியன்' சின்னத்தில் போட்டியிடவோ அல்லது ஆதரவு அளிக்கவோ முன்வந்துள்ளன.

இந்த மெகா கூட்டணி குறித்து திமுகவினர் உற்சாகமாகப் பேசி வருகின்றனர். "எதிர்க்கட்சிகள் இன்னும் கூட்டணி அமைப்பதிலேயே தடுமாறி வரும் நிலையில், நாங்கள் 21 கட்சிகளுடன் அசுர பலத்துடன் தயாராகிவிட்டோம். இது வெறும் கூட்டணி அல்ல, 2026-ல் மீண்டும் ஆட்சியைப் பிடிப்பதற்கான ஒரு பெரும் படை" என உடன்பிறப்புகள் தெரிவித்து வருகின்றனர்.