திமுகவின் எ.வ.வேலு, சேகர்பாபு, கே.என். நேரு காரணமா? - மின் வாரியத்திற்கு ரூ.1,07,365 கோடி, போக்குவரத்தில் ரூ. 43,865 கோடி.. கடனில் கதறும் பொதுத்துறை நிறுவனங்கள்!

நேற்று நிதிநிலை குறித்த வெள்ளை அறிக்கை தாக்கல் செய்யப்பட்ட நிலையில், தமிழகத்தை 10 வருடங்கள் பின்னோக்கி கடந்த திமுக ஆட்சி இழுத்து சென்றுள்ளது என்று சமூக வலைதளங்களில் பரவத் தொடங்கியது. பொதுத்துறை நிறுவனங்களின் கடன் தொகையும் வெளியிடப்பட்டு அதிர வைத்திருக்கிறது. இதில் இந்த ஆட்சியிலும் இலவச பேருந்து பயணம் அறிவிக்கப்பட்டுள்ளது.  இலவசமாகத் தருகிறேன் என்று கடன் சுமையை அடுத்த தலைமுறை மீதும் ஏற்றுகிறார்கள் ஆட்சியாளர்கள். இதில் கட்சி பேதம் எல்லாம் இல்லாமல், பொதுவாக அரசியல்வாதிகளின் பொறுப்பில்லாத வாக்குறுதிகளாகவே இருக்கிறது.

நேற்று தமிழகத்தின் ஒட்டுமொத்த நிதி மேலாண்மை குறித்த வெள்ளை அறிக்கையை வெளியிட்ட நிதியமைச்சர் என். மரிய வில்சன், தமிழக அரசின் நேரடிக் கடன் விபரங்களை மட்டுமன்றி, நலிவடைந்து போயுள்ள முக்கியப் பொதுத்துறை நிறுவனங்களின் திடுக்கிடும் கடன் நிலவரங்களையும் வெளிப்படையாகப் பட்டியலிட்டுள்ளார்.

மாநிலத்தின் உண்மையான ஒட்டுமொத்தக் கடன் ரூ.13.18 லட்சம் கோடியாக உயர, இந்த பொதுத்துறை நிறுவனங்களின் கட்டுக்கடங்காத நஷ்டமும் கடனுமே முதன்மைக் காரணம் என்பது இந்த வெள்ளை அறிக்கை மூலம் வெளிச்சத்திற்கு வந்துள்ளது.

செய்தியாளர் சந்திப்பில் நிதியமைச்சர் மரிய வில்சன் வெளியிட்ட பொதுத்துறை நிறுவனங்களின் கடன் அதிர்ச்சியை ஏற்படுத்தியுள்ளது.  தமிழக மின் உற்பத்தி மற்றும் பகிர்மான கழகம் ஒட்டுமொத்தமாக ரூ. 1,07,365 கோடி என்ற இமாலயக் கடனில் மூழ்கியுள்ளது. மின்சார விநியோகக் கட்டமைப்பு மற்றும் கொள்முதலில் முந்தைய அரசு காட்டிய அலட்சியமே இந்த அளவிற்குப் பெரிய கடன் சுமைக்குக் காரணம் எனச் சுட்டிக்காட்டப்பட்டுள்ளது.

தமிழகத்தில் உள்ள அரசுப் போக்குவரத்துக் கழகங்கள் அனைத்தும் சேர்த்து தற்போது ரூ. 43,865 கோடி கடனில் தவித்து வருகின்றன. டீசல் விலை உயர்வு மற்றும் முறையற்ற நிதி ஒதுக்கீடுகளால் இத்துறை கடுமையான நிதி நெருக்கடியைச் சந்தித்துள்ளது.

அமைச்சர் மரிய வில்சன் இந்த பொதுத்துறை நிறுவனங்களின் நிலை குறித்துப் பேசுகையில், "மின்வாரியம் மற்றும் போக்குவரத்துக் கழகங்கள் போன்ற பொதுத்துறை நிறுவனங்கள், மக்களுக்குச் சேவை செய்ய வேண்டிய மிக முக்கியமான துறைகளாகும். ஆனால், முந்தைய திமுக அரசின் தவறான திட்டமிடலால் இவை தங்களின் தினசரி செயல்பாடுகளுக்கே கடனை மட்டுமே நம்பியிருக்கும் நிலைக்குத் தள்ளப்பட்டுள்ளன. இந்த நிறுவனங்களின் கடன் சுமையைக் குறைத்து, நஷ்டத்திலிருந்து இவற்றை மீட்டெடுப்பதற்கான தீவிர சீர்திருத்த நடவடிக்கைகள் விரைவில் மேற்கொள்ளப்படும்."

முதலமைச்சர் விஜய் தலைமையிலான புதிய தவெக அரசு, இந்த வெள்ளை அறிக்கையின் அடிப்படையில் மின்வாரியம் மற்றும் போக்குவரத்துக் கழகங்களை லாபப் பாதைக்குத் திருப்புவதற்கும், மக்கள் மீது கூடுதல் சுமை விழாமல் நிர்வகிப்பதற்கும் தேவையான பொருளாதார வல்லுநர்களின் ஆலோசனைகளைப் பெற்று அடுத்தகட்ட நடவடிக்கைகளைத் தீவிரப்படுத்தியுள்ளது.

கடந்த திமுக ஆட்சியிலும் அனைத்து துறைகளிலும் வலம் வந்த  முன்னாள் அமைச்சர் சேகர்பாபுவும் இந்த கடன் சுமைக்கு காரணம் என்று சமூக வலைத்தளங்களில் பரவி வருகிறது. அதே போன்று அரசியல் விமர்சகர்கள் முன்னாள் அமைச்சர்கள் எ.வ.வேலு, கே.என். நேருவையும் கைகாட்டுகிறார்கள். மூத்த அமைச்சர்களான இவர்கள் துறைகளிலேயே இப்படி கோடிக்கணக்கில் கடன் இருப்பதால் சமூக வலைத்தளங்களில் கண்டனங்களும், திமுகவின் மீதான அதிருப்தியும் குவிந்து வருகிறது.