“தந்தைக்கு மகன் கொடுப்பது கடனா?” - ரூ. 5 கோடி விவகாரத்தில் எஸ்.ஏ. சந்திரசேகர் விளக்கம்!

தமிழக வெற்றிக் கழகத் தலைவர் விஜய் தனது வேட்புமனுவில் குடும்ப உறுப்பினர்களுக்கு வழங்கிய பண விபரங்களைக் குறிப்பிட்டிருந்தது பேசுபொருளான நிலையில், அவரது தந்தை எஸ்.ஏ. சந்திரசேகர் அது குறித்துத் தெளிவான விளக்கம் அளித்துள்ளார்.

விஜய் தாக்கல் செய்த சொத்து விபரப் பட்டியலில் தந்தை எஸ்.ஏ. சந்திரசேகருக்கு ₹3.02 கோடி வழங்கியுள்ளதாகவும், தாய் ஷோபாவிற்கு ₹87.12 லட்சம் வழங்கியுள்ளதாகவும், மனைவி சங்கீதாவிற்கு ₹12.6 கோடி வழங்கியுள்ளதாகவும் குறிப்பிட்டிருந்தார். இவை அனைத்தும் 'கடன்கள் மற்றும் முன்பணங்கள்' (Loans and Advances) என்ற பகுதியில் இடம்பெற்றிருந்ததால், விஜய் தனது தந்தைக்கே கடன் கொடுத்துள்ளாரா என விமர்சனங்கள் எழுந்தன.

இந்த விமர்சனங்களுக்குப் பதிலளித்துள்ள எஸ்.ஏ. சந்திரசேகர் "ஆண்டுக்கு ₹200 கோடி சம்பாதிக்கும் ஒரு மகன், தனது தந்தைக்கு ₹5 கோடி கொடுப்பது என்பது மிகச் சாதாரணமான ஒரு விஷயம். அதை ஒரு பெரிய விஷயமாகப் பார்க்க வேண்டிய அவசியமில்லை. விஜய் அதை எனக்குக் கடனாகக் கொடுக்கவில்லை. 'கொடுத்தேன்' என்றுதான் அவர் தனது கணக்கில் குறிப்பிட்டுள்ளார். அதை மற்றவர்கள் கடனாகப் பார்ப்பது தவறானது."

தங்களுக்குள் எவ்வித நிதி நெருக்கடியோ அல்லது மனக்கசப்போ இல்லை என்பதையும், ஒரு தந்தை தனது மகனிடம் உதவி பெறுவது அல்லது மகன் தந்தைக்குச் செய்வது குடும்ப ரீதியான அன்பு சார்ந்தது என்பதையும் அவர் தெளிவுபடுத்தியுள்ளார்.

ஏற்கனவே வருமான வரித் துறை அபராதம் தொடர்பான வழக்குகள் மற்றும் சொத்து மதிப்பு (சுமார் ₹625 கோடி) குறித்து எதிர்க்கட்சிகள் விமர்சித்து வரும் நிலையில், எஸ்.ஏ.சி-யின் இந்த விளக்கம் விஜய்க்கு ஒரு தார்மீக பலத்தை அளித்துள்ளது. நாளை மறுதினம் வாக்குப்பதிவு நடைபெறவுள்ள சூழலில், குடும்ப விவகாரங்களை அரசியலாக்க வேண்டாம் எனத் தவெக தொண்டர்கள் சமூக வலைதளங்களில் பதிவிட்டு வருகின்றனர்.