போலீசாரைத் தாக்கப் பாய்ந்த நாய் - துப்பாக்கியால் சுட்டதில் உயிரிழப்பு; விலங்கின ஆர்வலர்கள் கண்டனம்!

அமெரிக்காவின் லாஸ் ஏஞ்சல்ஸ் நகரில் கூடைப்பந்து போட்டி வெற்றியைக் கொண்டாடிக் கொண்டிருந்த போது, பாதுகாப்புப் பணியில் ஈடுபட்டிருந்த காவலர்களைத் தாக்கப் பாய்ந்த வளர்ப்பு நாய் ஒன்று போலீசாரால் துப்பாக்கியால் சுட்டுக் கொல்லப்பட்டுள்ளது. இச்சம்பவம் சர்வதேச அளவில் விலங்கின ஆர்வலர்களிடையே பெரும் கொந்தளிப்பை ஏற்படுத்தியுள்ளது.

லாஸ் ஏஞ்சல்ஸ் பகுதியில் உள்ளூர் கூடைப்பந்து அணியின் வெற்றியைத் தொடர்ந்து, ரசிகர்கள் வீதிகளில் இறங்கிப் பட்டாசுகள் வெடித்துப் பிரம்மாண்டமாகக் கொண்டாடிக்கொண்டிருந்தனர். அப்போது கூட்ட நெரிசலுக்கு நடுவே திடீரென எழுந்த பயங்கர அலறல் சத்தத்தைக் கேட்டு, அப்பகுதியில் ரோந்துப் பணியில் ஈடுபட்டிருந்த காவலர்கள் உடனடியாக அந்த இடத்திற்கு விரைந்தனர்.

அப்போது அங்கிருந்த நாய் ஒன்று, திடீரெனக் கட்டுப்பாட்டை இழந்து அங்கிருந்த காவலர்களை நோக்கி தாக்கப் பாய்ந்தது. தற்காப்புக்காகவும், கூட்டத்தில் இருந்த மற்ற பொதுமக்களின் பாதுகாப்பைக் கருதியும், காவலர்கள் தங்களின் துப்பாக்கியை எடுத்து அந்த நாயை நோக்கிச் சுட்டனர். இதில் குண்டு பாய்ந்த அந்த வளர்ப்பு நாய் சம்பவ இடத்திலேயே பரிதாபமாக உயிரிழந்தது.

கண் இமைக்கும் நேரத்தில் தனது செல்லப் பிராணி சுட்டுக் கொல்லப்பட்டதைக் கண்டு, அதன் உரிமையாளர் சம்பவ இடத்திலேயே கண்ணீர் விட்டு கதறி அழுதார். இந்தச் சம்பவத்தின் காணொளி சமூக வலைதளங்களில் பரவியதைத் தொடர்ந்து, "நாயைக் கட்டுப்படுத்த மாற்று வழிகளைப் பயன்படுத்தியிருக்கலாம், துப்பாக்கிச் சூடு நடத்தியது மிகக் கொடூரமானது" எனக் கூறி விலங்கின ஆர்வலர்கள் காவல் துறைக்குக் கடுமையான கண்டனங்களைத் தெரிவித்து வருகின்றனர்.

சர்வதேச அளவில் இந்த விவகாரம் விவாதப் பொருளாக மாறியுள்ள நிலையில், லாஸ் ஏஞ்சல்ஸ் காவல் துறைத் தலைவர் ஜிம் மெக்டொனால் செய்தியாளர்களைச் சந்தித்துத் தனது வருத்தத்தைப் பதிவு செய்துள்ளார்: "ஒரு வளர்ப்புப் பிராணியின் இழப்பு என்பது அந்தப் பிரியமான குடும்பத்திற்கு எவ்வளவு பெரிய துயரமானது என்பதை எங்களால் முழுமையாகப் புரிந்து கொள்ள முடிகிறது. இக்கட்டான இச்சம்பவத்திற்காக நாங்கள் மிகவும் வருந்துகிறோம். இதுபோன்ற இக்கட்டான அசாதாரண சூழ்நிலைகளைக் கையாள்வதற்குக் காவலர்களுக்கு சிறப்புப் பயிற்சிகள் வழங்கப்பட்டு வருகின்றன" என ஜிம் மெக்டொனால்  தெரிவித்துள்ளார். இருப்பினும், இச்சம்பவம் குறித்துத் துறை ரீதியான உயர்மட்டப் புலனாய்வு விசாரணைக்கு உத்தரவிடப்பட்டுள்ளதாக அமெரிக்கப் பாதுகாப்பு வட்டாரங்கள் தெரிவிக்கின்றன.