பட்டுடுத்தி, மாலை சூட்டி , மேளதாளத்துடன் கழுதைகளுக்கு கல்யாணம்... மழை வேண்டி நூதன வழிபாடு!

வேலூர் மாவட்டம் ஒடுகத்தூர் மற்றும் சுற்றுவட்டாரப் பகுதிகளில் நிலவி வரும் கடும் வறட்சி மற்றும் தண்ணீர் பற்றாக்குறையைப் போக்கும் நோக்கில் பொதுமக்கள் நூதன முறையில் வழிபாடு நடத்தியுள்ளனர். அப்பகுதி மக்களின் பாரம்பரிய நம்பிக்கையின்படி நல்ல மழை பொழிய வேண்டும் என்று வேண்டி ஆண் மற்றும் பெண் கழுதைகளுக்குச் சிறப்பாகத் திருமணம் செய்து வைக்கப்பட்டுள்ளது. இதற்காக இரு கழுதைகளுக்கும் மணமகன் மற்றும் மணமகள் போன்ற அலங்காரங்கள் செய்யப்பட்டு மேளதாளங்களுடன் ஊர்வலமாக அழைத்து வரப்பட்டன.

இதனைத் தொடர்ந்து அங்குள்ள கோவிலில் சிறப்புப் பூஜைகள் நடத்தப்பட்டு, யாகங்கள் வளர்க்கப்பட்டு, ஐயரின் மந்திரங்கள் முழங்கப் பொதுமக்கள் முன்னிலையில் கழுதைகளுக்குத் திருமணம் கோலாகலமாக நடைபெற்றது. இந்த விசித்திரமான திருமண விழாவில் அப்பகுதியைச் சேர்ந்த ஏராளமான பொதுமக்களும் பொதுமக்களும் ஆர்வமுடன் கலந்துகொண்டு சிறப்பித்தனர்.

இந்த நிகழ்ச்சியில் பங்கேற்றால் திருமணம் ஆகாதவர்களுக்கு விரைவில் திருமணம் கைகூடும் என்ற வலுவான நம்பிக்கை உள்ளதால் ஏராளமான இளம் பெண்களும் ஆண்களும் இதில் கலந்துகொண்டனர்.நிகழ்ச்சியின் நிறைவில் விழாவில் கலந்துகொண்ட அனைத்துப் பொதுமக்களுக்கும் பாரம்பரிய முறைப்படி அன்னதானம் வழங்கப்பட்டு மகிழ்ச்சி வெளிப்படுத்தப்பட்டது. வறட்சியைப் போக்கவும் மழை பெய்யவும் முன்னோர்கள் பின்பற்றிய இந்தச் சம்பிரதாயம் அப்பகுதியில் பெரும் பரபரப்பையும் ஆச்சரியத்தையும் ஏற்படுத்தியுள்ளது.